பஞ்சாப் மாநிலத்தைச் சேர்ந்த ஆம் ஆத்மி கட்சியின் (AAP) மாநிலங்களவை உறுப்பினர்கள் 7 பேர் அதிரடியாக பாஜகவில் இணைந்ததைத் தொடர்ந்து, அம்மாநில அரசியலில் பெரும் பதற்றம் நிலவி வருகிறது. குறிப்பாக, முன்னாள் கிரிக்கெட் வீரரும் எம்.பி-யுமான ஹர்பஜன் சிங்கின் வீட்டின் சுவர்களில் "துரோகி" என வாசகங்கள் எழுதப்பட்டது பெரும் பரபரப்பை ஏற்படுத்தியுள்ளது.

நடந்தது என்ன?

கடந்த வெள்ளிக்கிழமை (ஏப்ரல் 24, 2026), ராகவ் சத்தா தலைமையில் ஹர்பஜன் சிங் உள்ளிட்ட 7 ஆம் ஆத்மி எம்.பி-க்கள் தங்களை பாஜகவுடன் இணைத்துக் கொண்டனர். இந்த அதிரடித் தாவலை "துரோகம்" என்று வர்ணித்த பஞ்சாப் முதலமைச்சர் பகவந்த் மான், "பஞ்சாப் மக்கள் இந்தத் துரோகிகளை ஒருபோதும் மன்னிக்க மாட்டார்கள்" என்று ஆவேசமாகத் தெரிவித்தார்.

இதன் தொடர்ச்சியாக, சனிக்கிழமை மதியம் ஜலந்தரில் உள்ள ஹர்பஜன் சிங்கின் இல்லத்திற்கு வெளியே ஆம் ஆத்மி கட்சியின் இளைஞர் அணியினர் திரண்டு போராட்டங்களில் ஈடுபட்டனர். அப்போது ஆவேசமடைந்த போராட்டக்காரர்கள், ஹர்பஜன் சிங்கின் வீட்டின் வெளிப்புறச் சுவர்களில் கறுப்பு மையால் "துரோகி" (Traitor) என்கிற வாசகத்தை எழுதியதுடன், அவருக்கு எதிராகக் கண்டன முழக்கங்களை எழுப்பினர்.

பின்னணி 

போராட்டத்தின் போது பலர் தங்களது கண்களில் கறுப்புத் துணிகளைக் கட்டிக்கொண்டு மௌனப் போராட்டத்திலும் ஈடுபட்டனர். போராட்டத்தின் போது ஹர்பஜன் சிங் வீட்டில் இல்லை என்று கூறப்படுகிறது. ராகவ் சத்தா, சந்தீப் பாடக், அசோக் மிட்டல், ஹர்பஜன் சிங், ராஜேந்தர் குப்தா, விக்ரம் சிங் சாஹ்னி மற்றும் ஸ்வாதி மாலிவால் ஆகிய 7 பேரும் ஒரே நேரத்தில் பிரிந்து சென்றது ஆம் ஆத்மி கட்சிக்கு டெல்லி மற்றும் பஞ்சாப் ஆகிய இரு இடங்களிலும் மிகப்பெரிய பின்னடைவாகக் கருதப்படுகிறது.

அரசியல் ரீதியாக ராகவ் சத்தா மற்றும் ஹர்பஜன் சிங் போன்ற பிரபல முகங்கள் வெளியேறியது, 2027 பஞ்சாப் சட்டமன்றத் தேர்தலுக்கு முன்னதாக பாஜகவின் பலத்தை அதிகரிக்கும் ஒரு நகர்வாகப் பார்க்கப்படுகிறது.

இருப்பினும், சொந்த ஊரிலேயே ஹர்பஜன் சிங்கிற்கு எதிராக எழுந்துள்ள இந்த எதிர்ப்பு, மக்கள் மத்தியில் இந்தத் தாவல் குறித்த அதிருப்தியை வெளிப்படுத்துவதாக அரசியல் விமர்சகர்கள் கருதுகின்றனர்.