நடிகர் விஜய் நடித்த பிகில் திரைப்படத்தில் நடித்ததற்காக ஆறு மாதங்கள் பணியாற்றியும் தனக்கு குறைந்த அளவிலான சம்பளமே கிடைத்ததாக நடிகை இந்திரஜா ஷங்கர் தெரிவித்துள்ளார். சமீபத்தில் அளித்த பேட்டியில் அவர் தனது ஆரம்பகால சினிமா அனுபவங்களையும் சம்பள விவரங்களையும் பகிர்ந்துள்ளார்.

தமிழ் காமெடி நடிகர் ரோபோ ஷங்கரின் மகளான இந்திரஜா ஷங்கர், 2019ஆம் ஆண்டு வெளியான பிகில் திரைப்படத்தின் மூலம் சினிமாவில் அறிமுகமானார். அந்தப் படத்தில் விஜய்யுடன் இணைந்து ‘பாண்டியம்மா’ என்ற கதாபாத்திரத்தில் நடித்திருந்தார். முதல் படத்திலேயே பெரிய வாய்ப்பு கிடைத்தாலும், அதற்காக பெற்ற சம்பளம் மிகக் குறைவாக இருந்ததாக அவர் கூறியுள்ளார்.

தனியார் யூடியூப் சேனலுக்கு அளித்த பேட்டியில், பிகில் மற்றும் தனது சமீபத்திய TN 2026 படத்தின் சம்பளத்தை ஒப்பிட்டு பேசும்போது, “பிகில் படத்துக்காக மொத்தம் 180 நாட்கள் வேலை செய்தேன். படப்பிடிப்பு, டப்பிங் உள்ளிட்ட அனைத்தும் சேர்த்து ஆறு மாதங்கள் உழைத்தேன். அதற்காக எனக்கு ரூ.3 லட்சம் மட்டுமே சம்பளமாக கிடைத்தது” என்று தெரிவித்தார்.

அப்போது தான் புதுமுகமாக இருந்ததால் அந்த வாய்ப்பை தவறவிடக்கூடாது என்று தந்தை ரோபோ ஷங்கர் அறிவுரை கூறியதாகவும் அவர் பகிர்ந்தார். “என் அப்பா தனது 15 வருட சினிமா பயணத்திற்குப் பிறகுதான் விஜய்யுடன் தொடர்பான ஒரு வாய்ப்பு கிடைத்தது. ஆனால் எனக்கு முதல் படத்திலேயே விஜய்யுடன் நேரடியாக நடிக்கும் வாய்ப்பு கிடைத்தது. அதனால் சம்பளத்தைப் பற்றி யோசிக்காமல் அந்த வாய்ப்பை பயன்படுத்திக் கொள்ளச் சொன்னார்” என இந்திரஜா கூறினார்.

மேலும், சமீபத்தில் வெளியான TN 2026 திரைப்படத்தில் ஒரு நாள் மட்டுமே நடித்ததற்காக ரூ.40 ஆயிரம் சம்பளம் கிடைத்ததாகவும் அவர் தெரிவித்துள்ளார். அந்தப் படத்தின் கதையை நடிகர் தம்பி ராமையா எழுதியதாகவும், அவரை குடும்ப உறுப்பினராகவே கருதுவதால் சம்பளம் குறைவாக இருந்தாலும் அந்த வாய்ப்பை ஏற்றுக்கொண்டிருப்பேன் என்றும் இந்திரஜா கூறினார்.

TN 2026 திரைப்படத்தை தம்பி ராமையாவின் மகன் உமாபதி இயக்கியுள்ளார். இதில் நடிகர் நட்டி நட்ராஜ் முக்கிய கதாபாத்திரத்தில் நடித்துள்ளார். அரசியல் நையாண்டி பின்னணியில் உருவான இப்படம் கடந்த ஏப்ரல் 10ஆம் தேதி திரையரங்குகளில் வெளியாகியுள்ளது.

தொடக்கத்தில் குறைந்த சம்பளத்துடன் பயணத்தைத் தொடங்கிய இந்திரஜா, தற்போது தனது நடிப்பு வாய்ப்புகளையும் வளர்ச்சியையும் நிலைநிறுத்தி வருகிறார்.