இந்தியாவின் வட மாநிலங்களில் கோடையின் தாக்கம் நாளுக்கு நாள் தீவிரமடைந்து வரும் நிலையில், உத்தரப் பிரதேச மாநிலத்தில் கடுமையான வெப்ப அலை (Heatwave) காரணமாக மக்கள் பெரும் அவதிக்குள்ளாகியுள்ளனர். அம்மாநிலத்தின் 10 மாவட்டங்களுக்கு லக்னோ வானிலை ஆய்வு மையம் மிகக் கடுமையான 'சிவப்பு எச்சரிக்கை' (Red Alert) விடுத்துள்ளதுடன், இந்த அனல் காற்று சூழல் அடுத்த இரண்டு நாட்களுக்கும் மேலாக நீடிக்கும் என்றும் எச்சரித்துள்ளது.

மாவட்ட வாரியான வானிலை எச்சரிக்கைகள்:

வறண்ட மேற்குக் காற்று மற்றும் தீவிரமடையும் கதிர்வீச்சு வெப்பம் காரணமாக உத்தரப் பிரதேசம் முழுவதும் வெயில் வறுத்தெடுத்து வருகிறது. இதன் காரணமாகப் பின்வரும் எச்சரிக்கைகள் விடுக்கப்பட்டுள்ளன:

சிவப்பு எச்சரிக்கை (10 மாவட்டங்கள்): பண்டா, சித்ரகூட், கவுசாம்பி, பிரயாக்ராஜ், ஃபதேபூர், பிரதாப்கர், மிர்சாபூர், வாரணாசி, பதோஹி மற்றும் ஜான்பூர் ஆகிய மாவட்டங்களில் 'மிகக் கடுமையான' வெப்ப அலை வீசக்கூடும். இது பொதுமக்களின் சுகாதாரத்திற்குப் பெரும் அச்சுறுத்தலாக மாறும் என எச்சரிக்கப்பட்டுள்ளது.

ஆரஞ்சு எச்சரிக்கை (34 மாவட்டங்கள்): பாக்பத், மீரட், காஜியாபாத், ஹப்பூர், கவுதம் புத்த நகர், பலந்த்ஷஹர், அலிகார், மதுரா, ஆக்ரா உள்ளிட்ட 34 மாவட்டங்களுக்கு ஆரஞ்சு எச்சரிக்கை விடுக்கப்பட்டுள்ளது.

மஞ்சள் எச்சரிக்கை (17 மாவட்டங்கள்): தலைநகர் லக்னோ, சீதாபூர், ஹர்தோய், தேவரியா, லக்கிம்பூர் கேரி, ஃபரூக்காபாத், பாரபங்கி, அயோத்தி உள்ளிட்ட மாவட்டங்களுக்கு மஞ்சள் எச்சரிக்கை விடுக்கப்பட்டுள்ளது.

உச்சகட்ட வெப்பநிலை நிலவரம்:

நேற்று மாநிலத்தின் பல பகுதிகளில் வெப்பத்தின் அளவு புதிய உச்சத்தைத் தொட்டது. குறிப்பாக, பாண்டா மாவட்டத்தில் அதிகபட்சமாக 47.6°C வெப்பநிலை பதிவாகி மக்களை வாட்டியெடுத்தது. இதற்கு அடுத்தபடியாகப் பிரயக்ராஜில் 46.6°C மற்றும் வாரணாசியில் 45.6°C வெப்பமும் பதிவாகியது. மேலும், அடுத்த 48 மணி நேரத்தில் இந்த அதிகபட்ச வெப்பநிலை படிப்படியாக மேலும் 2 முதல் 3 டிகிரி செல்சியஸ் வரை உயரக்கூடும் என்று வானிலை மையம் கணித்துள்ளது.

முதலமைச்சர் யோகி ஆதித்யநாத்தின் போர்க்கால உத்தரவு:

கடுமையான வெப்ப அலையை எதிர்கொள்ளவும், வெயில் தொடர்பான நோய்களைத் தடுக்கவும் அனைத்துத் துறைகளும் முழு எச்சரிக்கையுடன் இருக்குமாறு முதலமைச்சர் யோகி ஆதித்யநாத் உத்தரவிட்டுள்ளார். மாவட்ட நிர்வாகங்கள், மருத்துவமனைகள், மின்சாரம் மற்றும் நிவாரணத் துறைகள் தடையற்ற மின் விநியோகத்தை உறுதி செய்ய வேண்டும் என்றும்; போதுமான மருந்துகள், படுக்கைகள் மற்றும் 24 மணி நேர ஆம்புலன்ஸ் சேவைகளைத் தயார் நிலையில் வைத்திருக்கவும் அறிவுறுத்தியுள்ளார். கோடைக்காலத் தீ விபத்துகளுக்கு எதிரான முன்னெச்சரிக்கை நடவடிக்கைகளைத் தீவிரப்படுத்தவும் அதிகாரிகளுக்கு அவர் உத்தரவிட்டுள்ளார்.