தெலுங்கானா மாநிலம் நல்கொண்டா மாவட்டத்தில் உள்ள தனியார் பள்ளியில் தலைமை ஆசிரியையாக பணியாற்றி வந்தவர் ரூபா ரெட்டி. கடந்த ஆகஸ்ட் 11-ம் தேதி வீட்டில் கத்தியால் குத்தப்பட்ட நிலையில் அவர் சடலமாக மீட்கப்பட்டார். இந்த சம்பவம் அப்பகுதியில் பெரும் அதிர்ச்சியை ஏற்படுத்தியது.

சம்பவம் தொடர்பாக விசாரணையை தீவிரப்படுத்திய காவல்துறையினர், 5 தனிப்படைகளை அமைத்து பல்வேறு கோணங்களில் விசாரணை நடத்தினர். இதில், அதே பள்ளியில் 10-ம் வகுப்பு படித்து வரும் 2 சிறுவர்களுக்கு கொலையில் தொடர்பு இருப்பது தெரியவந்ததாகத் தெரிவிக்கப்படுகிறது.

கொலைக்கு முன்பு ரூபா ரெட்டி தனது அத்தையுடன் தொலைபேசியில் பேசியுள்ளார். அப்போது அருகில் இருந்த ஒருவரை அவர் ‘பாபு’ என்று அழைத்ததாகத் தெரிவிக்கப்படுகிறது.

மாணவர்களை அழைக்க ரூபா ரெட்டி வழக்கமாக பயன்படுத்தும் வார்த்தை இதுவாக இருந்ததால், காவலர்களுக்கு சந்தேகம் ஏற்பட்டுள்ளது.இதையடுத்து கொலை நடந்த காலகட்டத்தில் பள்ளிக்கு வராத மாணவர்களின் பட்டியலை காவலர்கள் ஆய்வு செய்தனர். சம்பவம் நடந்த 4 நாட்களுக்குப் பிறகு பள்ளி திறக்கப்பட்ட நிலையில், தொடர்ந்து பள்ளிக்கு வராத 13 மாணவர்களை அடையாளம் கண்டு விசாரணை மேற்கொண்டனர்.

அப்போது அவர்களில் 10-ம் வகுப்பு படிக்கும் 2 மாணவர்கள் திடீரென அதிக அளவில் பணத்தை வைத்துக்கொண்டு ஆடம்பரமாக செலவு செய்து வந்தது காவலர்களுக்கு சந்தேகத்தை ஏற்படுத்தியது.

தொடர்ந்து மேற்கொள்ளப்பட்ட சோதனையில், ஒரு சிறுவனிடம் இருந்து ரூ.1.54 லட்சம் ரொக்கம் கைப்பற்றப்பட்டது. அந்த பணத்தில் ரத்தக்கறைகள் இருந்ததாகத் தெரிவிக்கப்படுகிறது.

தடய அறிவியல் பரிசோதனையில், ரூபாய் நோட்டுகளில் இருந்த ரத்தக்கறை ரூபா ரெட்டியுடையது என்பது உறுதி செய்யப்பட்டதாகக் கூறப்படுகிறது. மேலும், 70-க்கும் மேற்பட்ட கண்காணிப்பு கேமரா பதிவுகளை காவலர்கள் ஆய்வு செய்ததில், சம்பவத்தில் இரு மாணவர்களுக்கும் தொடர்பு இருப்பது உறுதியானதாகத் தெரிவிக்கப்படுகிறது.

விசாரணையில், மாணவர்களில் ஒருவர் முன்பு பள்ளி விடுதியில் தங்கி படித்தது தெரியவந்துள்ளது. மதுபானம் மற்றும் மோட்டார் சைக்கிள் மீது அதிக ஆர்வம் கொண்டிருந்த அந்த மாணவரின் பையில் இருந்து கைபேசி மற்றும் பணத்தை ரூபா ரெட்டி கைப்பற்றியதாகத் தெரிவிக்கப்படுகிறது.

இதையடுத்து அவரை கண்டித்ததுடன், விடுதியிலிருந்து வீட்டிற்கும் அனுப்பியுள்ளார். இதனால் ரூபா ரெட்டி மீது அந்த மாணவருக்கு கடும் ஆத்திரம் ஏற்பட்டதாகக் கூறப்படுகிறது.கொலைக்கு சில வாரங்களுக்கு முன்பு கோவாவுக்கு சென்றிருந்த அந்த மாணவர், எளிதான வழியில் பணம் சம்பாதிக்க திட்டமிட்டதாகவும், பள்ளிக் கட்டண பணம் ரூபா ரெட்டியின் வீட்டில் இருப்பதை அறிந்து அவரது வீட்டை முன்கூட்டியே கண்காணித்ததாகவும் விசாரணையில் தெரியவந்துள்ளது.

பின்னர் தனது நண்பரையும் இந்த திட்டத்தில் இணைத்துக்கொண்டதாகத் தெரிவிக்கப்படுகிறது.கடந்த ஆகஸ்ட் 11-ம் தேதி ரூபா ரெட்டி பள்ளி பணியை முடித்துவிட்டு வீட்டிற்கு திரும்பியுள்ளார்.

அப்போது முகத்தை மறைத்தபடி வந்த இரு சிறுவர்களும் சுவரேறி வீட்டிற்குள் புகுந்து அவரை தாக்கியதாகத் தெரிவிக்கப்படுகிறது.தாக்குதலின்போது ஒருவரின் முகமூடி விலகியதால், அவரை ரூபா ரெட்டி அடையாளம் கண்டுகொண்டதாகக் கூறப்படுகிறது. இதனால் தங்களை அடையாளம் கண்டுவிட்டார் என்ற அச்சத்தில், இருவரும் ரூபா ரெட்டியை கத்தியால் பலமுறை தாக்கி கொலை செய்ததாகத் தெரிவிக்கப்படுகிறது.

பின்னர் வீட்டில் இருந்த ரூ.1.54 லட்சம் பணம், ஒரு விலையுயர்ந்த கைபேசி மற்றும் ரூபா ரெட்டியின் கைபேசி ஆகியவற்றை எடுத்துக்கொண்டு இருவரும் அங்கிருந்து தப்பிச் சென்றதாகக் கூறப்படுகிறது.

விசாரணையின் அடிப்படையில் இரு சிறுவர்களையும் காவலர்கள் பிடித்துள்ளனர். இருவரும் சிறுவர்கள் என்பதால், சிறுவர் நீதி மன்றத்தில் ஆஜர்படுத்துவதற்கான நடவடிக்கைகள் மேற்கொள்ளப்பட்டு வருவதாகத் தெரிவிக்கப்படுகிறது.