கேரள அரசியல் களத்தில் பாரதிய ஜனதா கட்சி வேகமாக தனது அடையாளத்தை வலுப்படுத்தி வருகிறது. திருச்சூர் பாராளுமன்ற தொகுதியில் பா.ஜ.க. சார்பில் போட்டியிட்ட நடிகர் சுரேஷ் கோபி அபார வெற்றி பெற்று, தற்போது மத்திய அமைச்சராக பொறுப்பேற்றுள்ளதன் மூலம், கேரளாவில் கட்சியின் அரசியல் செல்வாக்கு புதிய உயரத்தை எட்டியுள்ளது.

அதே நேரத்தில், கடந்த மாதம் நடைபெற்ற உள்ளாட்சி தேர்தலில் திருவனந்தபுரம் மாநகராட்சியை முதல்முறையாக கைப்பற்றி, பா.ஜ.க. அரசியல் வரலாற்றில் முக்கிய மைல்கல்லை பதித்துள்ளது. இந்த வெற்றியைத் தொடர்ந்து, கேரள மாநிலத்தை மையமாகக் கொண்டு கட்சி தனது அரசியல் கவனத்தை தீவிரப்படுத்தியுள்ளது.

இதன் ஒரு பகுதியாக, சமீபத்தில் மத்திய உள்துறை அமைச்சர் அமித் ஷா கேரளா வந்து, கட்சி தலைவர்கள் மற்றும் தொண்டர்களுடன் ஆலோசனை நடத்தினார்.இந்த நிலையில், அடுத்த கட்ட அரசியல் நகர்வாக பிரதமர் நரேந்திர மோடி கேரளா வருகை தர உள்ளார்.

வருகிற 23-ம் தேதி, கேரள மாநிலத்தில் நடைபெறும் ரெயில்வே துறை சார்ந்த முக்கிய நிகழ்ச்சிகளில் அவர் பங்கேற்க உள்ளதாக தகவல்கள் வெளியாகியுள்ளன. அந்த நாளில் காலை 10.30 மணியளவில் டெல்லியிலிருந்து திருவனந்தபுரம் வந்தடையும் பிரதமர் மோடி, ரெயில்வே மேம்பாட்டு திட்டங்களின் தொடக்க விழாவில் கலந்து கொள்வார்.இந்த விழாவில் 4 புதிய ரெயில்கள் மற்றும் பல்வேறு முக்கிய ரெயில்வே திட்டங்களை பிரதமர் மோடி நாட்டுக்கு அர்ப்பணிக்க உள்ளார்.

இதனைத் தொடர்ந்து, பாரதிய ஜனதா கட்சி ஏற்பாடு செய்யும் அரசியல் கூட்டத்திலும் அவர் பங்கேற்க இருப்பதாக கூறப்படுகிறது. இந்த இரு நிகழ்ச்சிகளும் திருவனந்தபுரம் கீழக்கோட்டையில் அமைந்துள்ள புத்திரிக்கண்டம் மைதானத்தில் நடைபெற உள்ளன.

குறிப்பாக, திருவனந்தபுரம் மாநகராட்சியை பா.ஜ.க. முதல்முறையாக கைப்பற்றியதையொட்டி, மாநகரின் தலைநகர மேம்பாட்டு திட்டத்தை பிரதமர் மோடி அறிவிப்பார் என கட்சி வட்டாரங்களில் பரபரப்பாக பேசப்படுகிறது. இந்த அறிவிப்பு கேரள அரசியலில் புதிய விவாதங்களுக்கு தீப்பொறியாக அமையும் என எதிர்பார்க்கப்படுகிறது.

முதலில், பிரதமர் மோடி பங்கேற்கும் நிகழ்ச்சிகளை திருவனந்தபுரம் சென்ட்ரல் ஸ்டேடியத்தில் நடத்த ரெயில்வே துறை மற்றும் பா.ஜ.க. திட்டமிட்டிருந்ததாகவும், ஆனால் ஜனவரி 26-ம் தேதி நடைபெறும் குடியரசு தின அணிவகுப்பு காரணமாக அந்த இடத்தை வழங்க கேரள அரசு மறுத்ததாகவும் கூறப்படுகிறது.

இதன் பின்னர், நிகழ்ச்சிகள் புத்திரிக்கண்டம் மைதானத்திற்கு மாற்றப்பட்டு, அதற்கான ஏற்பாடுகள் தற்போது முழுவீச்சில் நடைபெற்று வருகின்றன.கேரள மாநில நிகழ்ச்சிகளை முடித்துக்கொண்ட பிரதமர் மோடி, அதே நாளில் மதியம் 12.40 மணியளவில் சென்னை புறப்பட்டுச் செல்ல உள்ளதாகவும் தகவல்கள் தெரிவிக்கின்றன.