நாடு முழுவதும் தினந்தோறும் லட்சக்கணக்கான பயணிகள் ரெயில் பயணச்சீட்டுகளை முன்பதிவு செய்ய பயன்படுத்தி வரும் இந்திய ரெயில்வேயின் அதிகாரப்பூர்வ இணையதளத்தில் நிலவி வந்த பல்வேறு தொழில்நுட்ப குறைபாடுகள் குறித்து தொடர்ந்து புகார்கள் எழுந்து வந்தன.

குறிப்பாக, அதிக அளவிலான பயனர்கள் ஒரே நேரத்தில் இணையதளத்தை அணுகும் வேளைகளில் செயல்திறன் குறைவு, பக்கங்கள் திறக்க தாமதம், திடீர் முடக்கம் மற்றும் பரிவர்த்தனை தடங்கல்கள் போன்ற பிரச்சினைகள் பயணிகளை கடும் சிரமத்திற்கு உள்ளாக்கி வந்ததாக தெரிவிக்கப்படுகிறது.

அதுமட்டுமின்றி, ஒருமுறை பயன்படுத்தப்படும் கடவுச்சொல் பெறுவதில் ஏற்படும் தாமதம், தட்கல் முன்பதிவின் போது உருவாகும் அதிகப்படியான சேவையக நெரிசல் மற்றும் கட்டண பரிவர்த்தனைகளில் ஏற்படும் இடையூறுகள் ஆகியவை பயணிகளின் முக்கிய குறைகளாக தொடர்ந்து இருந்து வந்தன.

இந்த சூழலில், பயணிகளுக்கு விரைவான, எளிமையான மற்றும் தடையற்ற சேவையை வழங்கும் நோக்கில் மேம்படுத்தப்பட்ட புதிய இணையதள வடிவமைப்பு உருவாக்கப்பட்டு வருவதாக மத்திய ரெயில்வே அமைச்சர் அஸ்வினி வைஷ்ணவ் தெரிவித்துள்ளார்.

மேலும், தற்போதுள்ள தொழில்நுட்ப சவால்களை களைந்து, அதிகளவிலான பயனர்கள் ஒரே நேரத்தில் பயன்படுத்தக்கூடிய திறனுடன் கூடிய புதிய மற்றும் நவீன வசதிகள் கொண்ட ஐ.ஆர்.சி.டி.சி. இணையதளம் வரும் ஜூலை 15-ஆம் தேதிக்குள் அறிமுகப்படுத்தப்படும் என்றும் அவர் தெரிவித்துள்ளார்.

புதிய இணையதளத்தின் வருகையால், முன்பதிவு செயல்முறை மேலும் எளிமையடைவதுடன், தட்கல் முன்பதிவு உள்ளிட்ட சேவைகளில் பயணிகள் எதிர்கொள்ளும் சிக்கல்கள் கணிசமாக குறையும் என எதிர்பார்க்கப்படுகிறது.