மத்திய கிழக்கு நாடுகளில் நிலவும் போர்ச் சூழல் உலகளவில் கச்சா எண்ணெய் மற்றும் எரிபொருள் விநியோகத்தில் பெரும் தாக்கத்தை ஏற்படுத்தியுள்ளது. இதன் விளைவாக, சர்வதேச அளவில் விமான எரிபொருளின் (ATF) விலை விண்ணைத் தொட்டுள்ளதால், விமானப் பயணக் கட்டணங்கள் மீண்டும் உயரத் தொடங்கியுள்ளன.

இண்டிகோ நிறுவனத்தின் அறிவிப்பு:
ஏற்கனவே ஏர் இந்தியா நிறுவனம் டிக்கெட் விலையில் கூடுதல் கட்டணங்களை வசூலித்து வரும் நிலையில், தற்போது இந்தியாவின் மிகப்பெரிய விமான நிறுவனமான இண்டிகோ (IndiGo) நாளை முதல் 'எரிபொருள் கூடுதல் கட்டணம்' (Fuel Surcharge) என்ற புதிய முறையை அமல்படுத்துகிறது.

கூடுதல் கட்டண விவரங்கள்:
பயண தூரம் மற்றும் சேருமிடத்தைப் பொறுத்து ஒரு டிக்கெட்டுக்கு ₹425 முதல் ₹2,300 வரை இந்தக் கூடுதல் கட்டணம் வசூலிக்கப்படும்:

உள்நாட்டுப் பயணம் (Domestic) - ₹425
மத்திய கிழக்கு நாடுகள் - ₹900
தென்கிழக்கு ஆசியா, சீனா & மேற்கு ஆசியா - ₹1,800
ஐரோப்பிய நாடுகள் (Europe) - ₹2,300

ஏன் இந்த உயர்வு?
தவிர்க்க முடியாத சர்வதேசப் பொருளாதாரச் சூழல் மற்றும் விமான எரிபொருள் விலை உயர்வு ஆகியவற்றால் இந்த முடிவை எடுத்துள்ளதாக இண்டிகோ தனது அறிக்கையில் தெரிவித்துள்ளது. ஏற்கனவே பயணக் கட்டணங்கள் அதிகரித்துள்ள நிலையில், இந்தப் புதிய கூடுதல் கட்டணம் கோடைக்கால விடுமுறைப் பயணத் திட்டங்களில் இருக்கும் சாமானியர்களுக்குப் கூடுதல் சுமையாக அமையும்.