திரையுலகிலும் சமூகத்திலும் தனது தனித்துவமான சிந்தனைகளால் எப்போதும் கவனம் ஈர்ப்பவர் நடிகர் மற்றும் இயக்குநர் பார்த்திபன். சமீபத்தில் 'சாதி, மதம் அற்றவர்' என்ற அதிகாரப்பூர்வ சான்றிதழைப் பெற்ற அவர், அந்த முன்னெடுப்பின் பின்னணியில் உள்ள சவால்கள் மற்றும் தனக்குக் கிடைத்து வரும் ஆதரவு குறித்து விரிவாகப் பேசியுள்ளார்.

சாதி மற்றும் மதமற்ற ஒரு சமூகத்தை உருவாக்க வேண்டும் என்பது காலம் காலமாகப் பல சமூக சீர்திருத்தவாதிகள் மற்றும் தலைவர்களின் கனவாக இருந்துள்ளது. "பல தலைவர்கள் மேடைகளில் கூறிய இந்த உன்னத நோக்கத்தை நான் உண்மையில் செயல்படுத்த முன்னெடுக்கும்போது, அதற்கு மட்டும் ஏன் இவ்வளவு பிரச்சினைகள் செய்யப்படுகின்றன?" என அவர் கேள்வி எழுப்பியுள்ளார்.

இருப்பினும், சாதி மற்றும் மதம் தேவை என்று நினைப்பவர்களைத் தான் ஒருபோதும் தவறாகவோ அல்லது குறைவாகவோ எடைபோடவில்லை என்பதையும் அவர் அழுத்தமாகப் பதிவு செய்துள்ளார்.

தமிழ் திரையுலகைப் பொறுத்தவரை, இத்தகைய சான்றிதழைப் பெற்ற முதல் நபர் தான்தான்,  இது வெறும் ஒரு காகிதச் சான்றிதழ் அல்ல, மாறாக ஒரு தனிமனிதன் தனது அடையாளத்தைச் சுயமாகத் தீர்மானிக்கும் உரிமை என்று பார்த்திபன் குறிப்பிட்டார். 

பார்த்திபனின் இந்தத் துணிச்சலான முயற்சிக்குப் பல முனைகளிலிருந்தும் ஆதரவு பெருகி வருகிறது. குறிப்பாக, திரையுலகின் மூத்த இயக்குநரான விக்ரமன், பார்த்திபனைத் தொலைபேசியில் அழைத்துத் தனது ஆதரவைத் தெரிவித்துள்ளார்.

"உங்களுடைய இந்த லிஸ்டில் (சாதி, மதம் அற்றவர்கள் பட்டியல்) என்னையும் சேர்த்துக் கொள்ளுங்கள்" என்று விக்ரமன் விருப்பம் தெரிவித்துள்ளதாக கூறிய பார்த்திபன், ஒரு "பெரிய லிஸ்ட்" தயாராகிக் கொண்டிருப்பதாகவும் தெரிவித்துள்ளார்.