மேற்கு வங்க சட்டமன்றத் தேர்தலின் இரண்டாம் கட்ட வாக்குப்பதிவு இன்று 142 தொகுதிகளில் விறுவிறுப்பாக நடைபெற்று வரும் நிலையில், அரசியல் களம் கடுமையான விமர்சனங்களாலும் சவால்களாலும் சூடுபிடித்துள்ளது. வாக்காளர்கள் நீண்ட வரிசையில் நின்று தங்களது ஜனநாயகக் கடமையை ஆற்றி வரும் வேளையில், திரிணாமுல் காங்கிரஸ் கட்சியின் (TMC) மூத்த தலைவரும் மாநிலங்களவை எம்.பி.யுமான டெரெக் ஓ பிரையன் வெளியிட்டுள்ள வீடியோ ஒன்று தேசிய அரசியலில் பெரும் பரபரப்பை ஏற்படுத்தியுள்ளது.

பிரதமருக்கு விடுக்கப்பட்ட சவால்
பிரதமர் நரேந்திர மோடியை நேரடியாகக் குறிப்பிட்டு டெரெக் ஓ பிரையன் விடுத்துள்ள அந்த வீடியோ பதிவில், பாஜகவின் தேர்தல் பிரச்சார வியூகங்களைக் கடுமையாகச் சாடியுள்ளார். "வங்காளத்தில் உள்ள 294 தொகுதிகளிலும் நீங்கள்தான் வேட்பாளர் என்று நீங்களே அறிவித்தீர்கள். இப்போது அந்தச் சவாலை ஏற்றுக்கொள்வதற்கான நேரம் வந்துவிட்டது," என்று அவர் குறிப்பிட்டுள்ளார்.

மேலும், பாஜக மற்றும் பிரதமர் மோடி தங்களைப் பற்றி வீண் பெருமை பேசுவதை நிறுத்திக்கொள்ள வேண்டும். பதவி விலகல் சவால்: வரும் மே 4-ம் தேதி தேர்தல் முடிவுகள் வெளியாகும் போது, மம்தா பானர்ஜி தலைமையிலான திரிணாமுல் காங்கிரஸ் மீண்டும் வெற்றி பெற்று ஆட்சியைப் பிடித்தால், பிரதமர் நரேந்திர மோடி தனது பதவியை ராஜினாமா செய்யும் துணிச்சல் உங்களுக்கு உண்டா? என அவர் கேள்வி எழுப்பியுள்ளார்.

திரிணாமுல் காங்கிரஸின் இந்த நேரடிச் சவால், மேற்கு வங்கத் தேர்தல் என்பது வெறும் மாநிலத் தேர்தல் மட்டுமல்ல, அது மம்தா பானர்ஜிக்கும் பிரதமர் மோடிக்கும் இடையிலான ஒரு நேரடி அதிகாரப் போட்டி என்பதை மீண்டும் ஒருமுறை உறுதிப்படுத்தியுள்ளது. ஏற்கனவே முதற்கட்டத் தேர்தலில் 91 சதவீதத்திற்கும் அதிகமான வாக்குகள் பதிவாகிச் சாதனை படைக்கப்பட்டுள்ள நிலையில், இரண்டாம் கட்டத் தேர்தலிலும் வாக்காளர்களின் ஆர்வம் குறையாமல் உள்ளது.