சென்னை: செயற்கை நுண்ணறிவு (AI) தொழில்நுட்பத்தின் வேகமான வளர்ச்சி காரணமாக, இந்திய இளைஞர்களுக்கு போதுமான வேலைவாய்ப்புகளை உருவாக்குவதே எதிர்காலத்தின் மிகப்பெரிய சவாலாக இருக்கும் என்று ஜோஹோ நிறுவனர் ஸ்ரீதர் வேம்பு தெரிவித்துள்ளார். ஐடி நிறுவனங்கள் புதிய பணியாளர்களை அதிக அளவில் நியமிப்பதை விட, ஏஐ கட்டமைப்புகள் மற்றும் டேட்டா சென்டர்களில் அதிக முதலீடு செய்து வருவதாகவும் அவர் கூறியுள்ளார்.

உலகம் முழுவதும் ஏஐ தொழில்நுட்பம் வேகமாக பரவி வரும் நிலையில், அதன் தாக்கம் வேலைவாய்ப்பு சந்தையிலும் பிரதிபலிக்கத் தொடங்கியுள்ளது. குறிப்பாக தகவல் தொழில்நுட்பத் துறையில் புதிய பணியமர்த்தல் மந்தமாகி வருவது குறித்து ஸ்ரீதர் வேம்பு தனது கருத்துகளை பகிர்ந்துள்ளார்.

இதுகுறித்து அவர் கூறுகையில், "இந்தியாவின் இளைஞர்களுக்கு வேலைவாய்ப்புகளை உருவாக்குவதுதான் தற்போது மிகப்பெரிய சவால். சர்வதேச பொருளாதார சூழல் மிகவும் நிச்சயமற்றதாக மாறியுள்ளது. ஜோஹோ உள்ளிட்ட பல நிறுவனங்கள் பெரிய அளவில் பணிநீக்கம் செய்யவில்லை என்றாலும், புதிய வேலைவாய்ப்புகளும் கணிசமாக உருவாகவில்லை. அதுதான் தற்போதைய உண்மை நிலை" என்றார்.

மேலும், "முன்பு புதிய ஊழியர்களை நியமிக்க பயன்படுத்தப்பட்ட நிதி, தற்போது ஏஐ கட்டமைப்புகள், டேட்டா சென்டர்கள் மற்றும் சர்வர்களுக்கான முதலீடாக மாறிவிட்டது. சர்வர்கள் மற்றும் மெமரி சாதனங்களின் விலை அதிகரித்துள்ளதால், நிறுவனங்கள் அதற்கு முன்னுரிமை அளிக்க வேண்டிய சூழல் ஏற்பட்டுள்ளது" என்றும் அவர் குறிப்பிட்டார்.

ஏஐ தொழில்நுட்பம் மென்பொருள் உருவாக்கத்தை வேகப்படுத்தியிருந்தாலும், "உலக சந்தைக்கு இன்னும் அதிகமான மென்பொருட்கள் உண்மையிலேயே தேவையா?" என்ற கேள்வியும் எழுந்துள்ளதாக அவர் தெரிவித்தார். மென்பொருள் துறை தற்போது ஒரு பொதுவான சந்தையாக மாறி வருவதாகவும், வளர்ச்சியை விட தரம், நம்பகத்தன்மை மற்றும் நிறுவனத்தின் பிராண்ட் மதிப்பே முக்கிய பங்காற்றும் என்றும் அவர் கூறினார்.

ஏஐ நிறுவனங்கள் தற்போது மிகப்பெரிய கட்டமைப்பு முதலீடுகளை மேற்கொண்டு வருவதாகவும், அந்த முதலீடுகளுக்கு ஏற்ற லாபம் எதிர்காலத்தில் கிடைக்குமா என்பது குறித்து இன்னும் உறுதி இல்லை என்றும் அவர் சுட்டிக்காட்டினார்.

ஐடி துறையைத் தாண்டியும் வேலைவாய்ப்பு உருவாக்கம் சவாலாகவே இருப்பதாகக் கூறிய ஸ்ரீதர் வேம்பு, "உற்பத்தித் துறையிலும் ஆட்டோமேஷன் அதிகரித்து வருவதால் மனித உழைப்பின் தேவை குறைகிறது. இதனால் பொருட்களின் விலை குறையலாம். ஆனால் அவற்றை வாங்கும் அளவுக்கு மக்களிடம் வருமானம் இருக்குமா என்பதே உண்மையான கேள்வி" என்றார்.

ஸ்ரீதர் வேம்புவின் இந்தக் கருத்துகள் சமூக வலைதளங்களில் பரவலாக விவாதிக்கப்பட்டு வருகின்றன. குறிப்பாக, இந்தியாவில் தகவல் தொழில்நுட்பத் துறை பல லட்சம் இளைஞர்களுக்கு வேலைவாய்ப்புகளை உருவாக்கிய நிலையில், அந்தத் துறையிலேயே புதிய பணியமர்த்தல் மந்தமாகி வருவதாக அவர் கூறியிருப்பது தொழில்துறை மற்றும் கல்வி வட்டாரங்களிலும் கவனத்தை ஈர்த்துள்ளது.