ஏப்ரல் 1, 2026 முதல் அமலுக்கு வரும் புதிய வருமான வரி விதிகள், வரித்தாரர்களுக்கு முற்றிலும் புதிய அனுபவத்தை உருவாக்கவிருக்கின்றன. குறிப்பாக, வருமான வரி தாக்கல் (ITR) செயல்முறையில் பல முக்கிய மாற்றங்கள் கொண்டு வரப்பட்டுள்ளதால், பழைய நடைமுறைகள் பல மாற்றம் காண்கின்றன.

இந்த மாற்றங்களில் மிகப்பெரிய கவனத்தை ஈர்ப்பது, பரவலாக பயன்படுத்தப்பட்ட ‘படிவம் 16’ நீக்கப்பட்டு, அதற்கு பதிலாக ‘படிவம் 130’ என்ற புதிய சான்றிதழ் அறிமுகப்படுத்தப்படுவது.

மேலும், சம்பளம் பெறும் ஊழியர்கள் மற்றும் ஓய்வூதியதாரர்களுக்கு வழங்கப்படும் இந்த புதிய ஆவணம், ஆண்டுதோறும் வரி பிடித்தம் (TDS) செய்யப்பட்ட விவரங்களை முழுமையாகவும் தெளிவாகவும் பதிவு செய்யும்.

படிவம் 130-ல் சம்பள வருமானம், பிடித்தம் செய்யப்பட்ட வரி, அரசுக்கு செலுத்தப்பட்ட தொகை, அனுமதிக்கப்பட்ட வரிச்சலுகைகள் போன்ற அனைத்து விவரங்களும் ஒருங்கிணைக்கப்பட்டிருக்கும். இதனால், வரித்தாரர்கள் தங்கள் வரி நிலையை எளிதாக புரிந்துகொள்ள முடியும் என்பதே நோக்கம்.

மேலும், இந்த புதிய முறையில் துல்லியத்தையும் வெளிப்படைத்தன்மையையும் அதிகரிக்க தானியங்கி தாக்கல் (automated filing) நடைமுறையும் அறிமுகமாகிறது.

படிவம் 130-ஐ கையால் நிரப்ப முடியாது; அது TRACES இணையதளம் மூலம் தானாக உருவாக்கப்படும் என்பதும் குறிப்பிடத்தக்கது.இதேவேளை, வருமான வரிச் சட்டம் 2025ன் பிரிவு 402(39) படி, குறிப்பிட்ட மூத்த குடிமக்களின் வட்டி வருமான விவரங்களும் இதில் சேர்க்கப்படும். இதன் மூலம், வரி நிர்வாகம் மேலும் டிஜிட்டல் மற்றும் துல்லியமான பாதையை நோக்கி நகர்கிறது.