மேற்கு வங்க மாநிலம் கொல்கத்தாவில் உள்ள ஒரு பிரபல இதயவியல் நிபுணர், தனது நோயாளிகளுக்கு அறிவித்துள்ள விநோதமான சலுகை ஒன்று தற்போது தேசிய அளவில் பெரும் விவாதத்தைக் கிளப்பியுள்ளது.

தெற்கு கொல்கத்தாவின் பாலிகுஞ்ச் பகுதியில் கிளினிக் நடத்தி வரும் டாக்டர் பி.கே. ஹஸ்ரா (Dr. P.K. Hazra), தனது ஆலோசனை கட்டணத்தில் (Consultation Fee) 500 ரூபாய் தள்ளுபடி பெற வேண்டுமானால், நோயாளிகள் 'ஜெய் ஸ்ரீ ராம்' என்று முழக்கமிட வேண்டும் என்ற நிபந்தனையை விதித்துள்ளார். தேர்தல் நெருங்கும் வேளையில், மருத்துவ சேவையுடன் அரசியலையும் மதத்தையும் இணைத்திருக்கும் இச்செயல் சர்ச்சையை ஏற்படுத்தியுள்ளது.

பாஜக ஆதரவாளரான டாக்டர் ஹஸ்ரா, தனது கிளினிக்கில் இது தொடர்பான போஸ்டர் ஒன்றையும் வைத்துள்ளார். அதில் அவர் பாஜக அடையாளங்களுடன் காட்சியளிக்கிறார். இந்தச் சலுகை குறித்து விளக்கம் அளித்த அவர், "மேற்கு வங்கத்தின் சுகாதாரக் கட்டமைப்பு மற்ற மாநிலங்களை விடப் பின்தங்கியுள்ளது.

இங்குள்ள நோயாளிகள் சிகிச்சைக்காகச் சென்னை அல்லது ஒடிசாவிற்குச் செல்லும் நிலை உள்ளது. இந்த நிலை மாற வேண்டுமானால் மாநிலத்தில் அரசியல் மாற்றம் (பாஜக ஆட்சி) ஏற்பட வேண்டும். அந்த விழிப்புணர்வை ஏற்படுத்தவே இந்தச் சிறு முயற்சியை மேற்கொண்டுள்ளேன்" என்று தெரிவித்துள்ளார். மேலும், இது முழுக்க முழுக்கத் தனது தனிப்பட்ட விருப்பம் என்றும் அவர் கூறியுள்ளார்.

இருப்பினும், இந்த நடவடிக்கைக்குப் பல்வேறு தரப்பிலிருந்தும் கடும் எதிர்ப்புகள் கிளம்பியுள்ளன. இந்திய மருத்துவச் சங்கம் (IMA) பெங்கால் பிரிவு, இது மருத்துவ அறநெறிகளுக்கு (Medical Ethics) எதிரானது என்று கண்டனம் தெரிவித்துள்ளது.

நோயாளிகளை அரசியல் அல்லது மத அடிப்படையில் பிரித்துப் பார்ப்பது ஒரு மருத்துவரின் தர்மம் அல்ல என்று கூறி, அவரிடம் விளக்கம் கேட்டு நோட்டீஸ் அனுப்பியுள்ளது. ஆளும் திரிணாமுல் காங்கிரஸ் கட்சியினரும், இது பாஜகவின் ‘வாஷிங் மெஷினில்’ இணைந்து தனது சொத்துகளைப் பாதுகாக்க அவர் செய்யும் நாடகம் என்று விமர்சித்துள்ளனர்.

மேற்கு வங்கத்தில் ஏப்ரல் 23 மற்றும் 29 ஆகிய தேதிகளில் சட்டமன்றத் தேர்தல் நடைபெறவுள்ள சூழலில், இத்தகைய மத ரீதியான பிரச்சாரங்கள் தேர்தல் களத்தில் அனலைப் பறக்க விட்டுள்ளன. ஏழை எளிய மக்கள் தள்ளுபடிக்காக இச்சலுகையைப் பயன்படுத்தினாலும், மருத்துவத் துறையில் அரசியல் தலையீடு ஆரோக்கியமானதல்ல என்றே சமூக ஆர்வலர்கள் கருதுகின்றனர். இந்த விவகாரம் தற்போது சமூக வலைதளங்களிலும் ஆதரவாகவும் எதிராகவும் விவாதிக்கப்பட்டு வருகிறது.