இணையதளத் (Data) தேவையில்லாத ஸ்மார்ட்போன் மற்றும் ஃபீச்சர் போன் பயனர்களின் நலனைக் கருத்தில் கொண்டு, அழைப்பு (Voice Call) மற்றும் குறுஞ்செய்தி (SMS) சேவைகளை மட்டும் உள்ளடக்கிய குறைந்த கட்டண ரீசார்ஜ் திட்டங்களைக் கட்டாயமாக அறிமுகப்படுத்த வேண்டும் எனத் தொலைத்தொடர்பு ஒழுங்குமுறை ஆணையம் (TRAI) அனைத்துத் தொலைத்தொடர்பு நிறுவனங்களுக்கும் அதிரடி உத்தரவிட்டுள்ளது.

தற்போதுள்ள சூழலில், தொலைத்தொடர்பு நிறுவனங்கள் தங்களின் ரீசார்ஜ் திட்டங்களில் கட்டாயமாக இணையதளத் தரவை (Data) இணைத்து அதிக விலைக்கு விற்பனை செய்வதாக நுகர்வோர்களிடம் இருந்து தொடர் புகார்கள் எழுந்தன. குறிப்பாக முதியோர்கள், குறைந்த வருவாய் பிரிவினர் மற்றும் ஃபீச்சர் போன்களை மட்டுமே பயன்படுத்தும் கோடிக்கணக்கான வாடிக்கையாளர்கள், தங்களுக்குத் தேவையில்லாத டேட்டா திட்டங்களுக்கும் சேர்த்து அதிகக் கட்டணம் செலுத்த வேண்டிய நிர்பந்தத்திற்குத் தள்ளப்பட்டனர்.

இதனை முறைப்படுத்தும் விதமாக 'தொலைத்தொடர்பு நுகர்வோர் பாதுகாப்பு (13-வது திருத்தம்) விதிகள், 2026'-ஐ டிராய் அதிகாரப்பூர்வமாக வெளியிட்டுள்ளது. இப்புதிய விதிமுறைகளின்படி, ரிலையன்ஸ் ஜியோ, பாரதி ஏர்டெல், வோடபோன் ஐடியா உள்ளிட்ட அனைத்துச் சேவை நிறுவனங்களும் 30 நாட்கள் அல்லது அதற்கும் குறைவான கால அளவு கொண்ட பிரத்யேக 'வாய்ஸ் மற்றும் எஸ்.எம்.எஸ்' ரீசார்ஜ் வவுச்சர்களைக் கட்டாயம் வழங்க வேண்டும். மேலும், ஒவ்வொரு மாதமும் குறிப்பிட்ட ஒரே தேதியில் புதுப்பிக்கும் (Renewal) வசதியுடனும், 30 நாட்களுக்கு மேற்பட்ட காலாவதி அவகாசம் கொண்ட திட்டங்களையும் நிறுவனங்கள் கட்டாயம் நுகர்வோருக்கு அளிக்க வேண்டும்.

டேட்டா கட்டணமின்றி அழைக்கப்படும் இந்த ரீசார்ஜ் திட்டங்களின் விலையைக் கணிசமாகக் குறைக்க வேண்டும் என்றும் டிராய் அறிவுறுத்தியுள்ளது. அழைப்பு மற்றும் குறுஞ்செய்தி சேவைகளை டேட்டாவில் இருந்து தனியாகப் பிரிப்பதன் மூலம், பொதுமக்கள் தங்களின் உண்மையான தேவைக்கு மட்டுமே கட்டணம் செலுத்தும் சூழல் உருவாகி, நாட்டின் கோடிக்கணக்கான சாமானிய நுகர்வோரின் மாதாந்திர ரீசார்ஜ் செலவு வெகுவாகக் குறையும் என எதிர்பார்க்கப்படுகிறது.