உத்தரப் பிரதேச மாநிலம் பலியா மாவட்டத்தில் கடந்த ஜூன் 11 அன்று இரவு அரங்கேறிய மிக அதிர்ச்சிகரமான குற்றச்சம்பவம் ஒன்று வெளிச்சத்திற்கு வந்துள்ளது. அன்று இரவு, ஐந்து வயது சிறுமி ஒருத்தி தனது தாத்தாவுடன் மோட்டார் சைக்கிளில் வெளியே சென்றுள்ளார். பலியா மாவட்டத்தின் பான்சடி என்ற பகுதிக்கு அருகே வந்தபோது, ஒரு அவசர வேலை நிமித்தமாக அவளது தாத்தா பைக்கை சாலையோரமாக நிறுத்தியுள்ளார். தாத்தா வேலை விஷயமாகச் சென்ற நேரத்தில், அச்சிறுமி மட்டும் தனியாக பைக்கிலேயே அமர்ந்திருந்துள்ளார்.

இந்தச் சூழ்நிலையைப் பயன்படுத்திக் கொண்ட சந்தன் குமார் ஷா (29) என்ற நபர், வேறொரு மோட்டார் சைக்கிளில் அந்த இடத்திற்கு வந்துள்ளார். பைக்கில் ஒரு சிறுமி தனியாக இருப்பதைக் கண்ட அவன், நொடிப் பொழுதில் அச்சிறுமியைக் கட்டாயமாகத் தூக்கிக்கொண்டு அங்கிருந்து தப்பி ஓடிவிட்டான்.

குழந்தையைக் காணாமல் பல இடங்களில் தேடியும் கிடைக்காததால், இரண்டு நாட்களுக்கு முன்பு சிறுமியின் தந்தை காவல் நிலையத்திற்குச் சென்று கண்ணீர்மல்கப் புகார் அளித்தார். இப்புகாரின் பேரில் உடனடியாகச் செயல்பட்ட காவல்துறையினர், குற்றவாளியைப் பிடிக்கப் பல தனிப்படைகளை அமைத்துத் தீவிரத் தேடுதல் வேட்டையில் ஈடுபட்டனர். போலீசாரின் துரித நடவடிக்கையால், தேடுதல் தொடங்கிய அன்றைய தினமே அச்சிறுமி பத்திரமாக மீட்கப்பட்டாள்.

மீட்கப்பட்ட சிறுமியைப் போலீசார் உடனடியாக அவசர மருத்துவப் பரிசோதனைக்காக அரசு மருத்துவமனைக்கு அனுப்பி வைத்தனர். அங்கு நடத்தப்பட்ட விரிவான மருத்துவப் பரிசோதனையில், அச்சிறுமி கொடூரமான முறையில் பாலியல் வன்கொடுமைக்கு ஆளாக்கப்பட்டிருப்பது உறுதி செய்யப்பட்டது. இதனைத் தொடர்ந்து, குற்றவாளி சந்தன் குமார் ஷா மீது வழக்குப் பதிவு செய்த போலீசார், தீவிரமாகத் தேடி தலைமறைவாக இருந்த அவனை நேற்று அதிரடியாகக் கைது செய்தனர்.