சென்னையில் வெளியான மருத்துவ ஆய்வுகள் கறிவேப்பிலையின் பல்வேறு மருத்துவக் குணங்களை வலியுறுத்துகின்றன. பொதுவாக சமையலறை மசாலா இலை எனக் கருதப்படும் கறிவேப்பிலை, ஆரோக்கியம் காக்கும் இயற்கை மருந்தாக திகழ்கிறது.

மருத்துவ நிபுணர்கள் கூறுகையில், கறிவேப்பிலை கொலஸ்ட்ராலைக் குறைத்து, மாரடைப்பைத் தடுக்கும் திறன் கொண்டது. அதிக எல்டிஎல் (LDL) கொழுப்பு இரத்த நாளங்களைச் சுருக்கி இதய நோய்களுக்கு வழிவகுக்கும் நிலையில், கறிவேப்பிலையை தொடர்ந்து உணவில் சேர்ப்பது அபாயத்தை குறைக்கிறது.

மாரடைப்பு தடுப்பு
மஹா நிம்பின் (Mahanimbine) என்ற ஆல்கலாய்டு, கறிவேப்பிலையில் காணப்படும் முக்கியச் சேர்மமாகும். இது கொலஸ்ட்ரால் மற்றும் ட்ரைகிளிசரைட்களை குறைப்பதன் மூலம் இதயத்தை ஆரோக்கியமாக வைத்திருக்கிறது. அமெரிக்க தேசிய மருத்துவ நூலகத்தின் (NCBI) ஆய்வுகளும் இதை உறுதிப்படுத்துகின்றன.

நீரிழிவு நோயாளிகளுக்கு நன்மை
விலங்குகள் மீதான ஆய்வுகளில், கறிவேப்பிலை உயர்ந்த ரத்த சர்க்கரையை குறைக்கும் திறன் கொண்டது என கண்டறியப்பட்டுள்ளது. இதன் மூலம் நரம்பு சேதம் மற்றும் சிறுநீரகச் சேதம் போன்ற நீரிழிவின் பின்விளைவுகளை தடுக்கும் என நிபுணர்கள் கருதுகின்றனர்.

மூளை ஆரோக்கியம்
மூளை மற்றும் நரம்பு மண்டலத்தை வலுப்படுத்தும் கறிவேப்பிலை, நரம்பு செல்கள் இழப்பைத் தடுக்கும். இதன் மூலம் அல்சைமர், டிமென்ஷியா போன்ற நரம்பு சம்பந்தமான நோய்களின் அபாயம் குறைகிறது.

புற்றுநோய்க்கு எதிர்ப்பு
கறிவேப்பிலையில் காணப்படும் வேதிப்பொருட்கள் புற்றுநோய் செல்களின் வளர்ச்சியைத் தடுக்கின்றன. அவற்றை உட்கொள்வதால், புற்றுநோய் சிகிச்சையின் செயல்திறன் கூடும் என்றும் ஆய்வுகள் தெரிவிக்கின்றன.

நோய் எதிர்ப்பு சக்தி
கறிவேப்பிலை, உடலின் நோய் எதிர்ப்பு சக்தியை அதிகரிக்கும் இயற்கை மூலிகையாகும். இதில் உள்ள வீக்கம் மற்றும் வலியைக் குறைக்கும் சேர்மங்கள், பாக்டீரியா தொற்றுகளையும் தடுக்கும்.

சுருக்கமாகச் சொல்வதானால், கறிவேப்பிலை உணவில் சுவையை மட்டுமல்ல, ஆரோக்கியத்தையும் வழங்குகிறது. இதய நோய், நீரிழிவு, நரம்பு சம்பந்தமான பிரச்சினைகள், புற்றுநோய் ஆகியவற்றுக்கு எதிராக பாதுகாப்பு அளிக்கும் இயற்கை மருந்தாக இது கருதப்படுகிறது.

(பொறுப்பு துறப்பு: இந்தக் கட்டுரை பொதுவான தகவல்களுக்காக மட்டுமே. இது எந்த மருந்து அல்லது சிகிச்சைக்கும் மாற்றாக இருக்க முடியாது. உடல்நிலை தொடர்பான முடிவுகளுக்கு எப்போதும் மருத்துவரை அணுகவும்.)