இந்தியாவில் மருத்துவத் துறையில் கனவு காணும் மாணவர்களுக்கு, ‘நீட்’ (NEET) தேர்வே நுழைவாயில் ஆக மாறியுள்ளது. நாட்டில் உள்ள எந்த அங்கீகரிக்கப்பட்ட மருத்துவக் கல்லூரி அல்லது பல்கலைக்கழகத்தில் MBBS, BDS போன்ற இளநிலை மற்றும் MD, MS போன்ற முதுநிலை படிப்புகளில் சேர வேண்டுமெனில், இந்த ஒரே தேர்வைத் தாண்டியே செல்ல வேண்டும்.

AIIMS, JIPMER போன்ற முன்னணி தேசிய மருத்துவ நிறுவனங்களின் இருக்கைகளும் இதன் மூலம் தான் நிரப்பப்படுகின்றன.

இந்தியாவில் மட்டும் அல்லாமல், வெளிநாடுகளில் மருத்துவப் படிப்பு மேற்கொள்ள விரும்பும் இந்திய மாணவர்களுக்கும் கூட, நீட் தேர்வில் தகுதி பெறுவது கட்டாய நிபந்தனையாக உள்ளது.

இதனால், நீட் இன்று மருத்துவக் கல்விக்கான ஒரே பொதுவான தரச்சான்றாக கருதப்படுகிறது.

இந்த தேர்வை நடத்துவது முதல், முடிவுகளை வெளியிடுவது வரை அனைத்தையும் தேசிய தேர்வு முகமை (NTA – National Testing Agency) திறம்பட ஒருங்கிணைத்து வருகிறது.

இளநிலை படிப்புகளுக்காக NEET-UG தேர்வும், முதுநிலை படிப்புகளுக்காக NEET-PG தேர்வும் தனித்தனியாக நடத்தப்படுகின்றன.

இந்நிலையில், 2026ஆம் ஆண்டுக்கான இளநிலை மருத்துவ சேர்க்கைக்கான NEET-UG நுழைவுத் தேர்வு மே 3ஆம் தேதி நடைபெறும் என NTA அறிவித்துள்ளது.

தேர்வுக்கு தயாராகும் மாணவர்கள் www.neet.nta.nic.in  என்ற அதிகாரப்பூர்வ இணையதளம் மூலம் ஆன்லைனில் விண்ணப்பிக்கலாம் என்றும் தெரிவிக்கப்பட்டுள்ளது.