கேரள மாநிலம் மலப்புரம் மாவட்டம் நீலம்பூரில் உள்ள ஒரு தனியார் கிளினிக்கில் சினிமா பாணியிலான விசித்திரத் திருட்டுச் சம்பவம் அரங்கேறியுள்ளது. 2 வயதுக் குழந்தையின் கழுத்திலிருந்த 3.5 கிராம் தங்க நகையை, அக்குழந்தையைக் கொஞ்சுவது போல நடித்து சமீனா (35) என்ற பெண் திருடியுள்ளார்.

திடுக்கிடும் திருப்பம்:
நகையைத் திருடியதை மக்கள் கவனித்துவிட்டதை அறிந்த சமீனா, பிடிபடுவதைத் தவிர்க்க அந்தத் தங்கச் சங்கிலியை அப்படியே வாயில் போட்டு விழுங்கிவிட்டார். போலீஸார் நடத்திய முதற்கட்ட விசாரணையில் அவர் எதையும் ஒப்புக்கொள்ளவில்லை. இருப்பினும், சந்தேகத்தின் பேரில் அவரை கோழிக்கோடு அரசு மருத்துவமனைக்கு அழைத்துச் சென்று எக்ஸ்ரே (X-ray) எடுத்துப் பார்த்தபோது, காணாமல் போன நகை அவரது வயிற்றுக்குள் இருப்பது உறுதியானது.

ஆதாரத்துடன் சிக்கிய சமீனாவை போலீஸார் உடனடியாகக் கைது செய்தனர். பின்னர் அறுவை சிகிச்சை இன்றி நகையை இயற்கையாக வெளியே எடுக்க மருத்துவர்கள் அவருக்குப் பலமுறை 'இனிமா' (Enema) கொடுத்துப் பார்த்தனர்.

தொடர் முயற்சிகள் செய்தும் நகை இன்னும் வெளியே வராததால், போலீஸாரும் மருத்துவர்களும் அடுத்தகட்ட மருத்துவ நடவடிக்கைகள் குறித்துத் தீவிரமாக ஆலோசித்து வருகின்றனர்.

 "திருடிய நகையை மறைக்க எத்தனையோ வழிகள் இருந்தாலும், உயிருக்கே ஆபத்தை ஏற்படுத்தும் வகையில் நகையை விழுங்கிய பெண்ணின் செயல் அங்குள்ளவர்களை அதிர்ச்சியில் ஆழ்த்தியுள்ளது."