கோலிவுட்டின் முக்கியமான இசையமைப்பாளர்களில் ஒருவராக ஜிவி பிரகாஷ் திகழ்கிறார். இசையமைப்பாளராக மட்டுமல்லாமல், நடிகராகவும் தனது பயணத்தை தொடர்கிறார். இரண்டு தேசிய விருதுகள் வென்றுள்ள அவர் தற்போது சூர்யா நடித்துவரும் படம் மற்றும் சிவகார்த்திகேயனின் ‘பராசக்தி’ உள்ளிட்ட பல திரைப்படங்களுக்கு இசையமைத்து பிஸியாக உள்ளார்.

ஏ.ஆர். ரஹ்மானின் சகோதரியின் மகனாக அறியப்படும் ஜிவி, வசந்தபாலன் இயக்கிய ‘வெயில்’ படத்தின் மூலம் டீனேஜ் வயதிலேயே இசையமைப்பாளராக அறிமுகமானார். அந்த படத்தின் இசை அவருக்கு முதல் வாய்ப்பிலேயே பெரும் புகழை பெற்றுத் தந்தது. தொடர்ந்து ‘ஆயிரத்தில் ஒருவன்’, ‘மயக்கம் என்ன’, ‘கிரீடம்’, ‘பொல்லாதவன்’, ‘மதராசபட்டினம்’, ‘தெய்வத்திருமகள்’, ‘பரதேசி’ உள்ளிட்ட பல படங்களின் இசையால் ரசிகர்களின் மனதை கவர்ந்தார்.

இசையமைப்பாளராக வெற்றி பெற்ற பிறகு, ஜிவி பிரகாஷ் நடிகராக ‘டார்லிங்’ திரைப்படத்தின் மூலம் அறிமுகமானார். தொடர்ந்து பல படங்களில் நடித்தாலும், எதிர்பார்த்த வெற்றியைப் பெற முடியவில்லை. ‘சிகப்பு மஞ்சள் பச்சை’, ‘சர்வம் தாளமயம்’, ‘நாச்சியார்’ போன்ற சில படங்கள் மட்டும் அவருடைய நடிப்புக்கு பாராட்டைப் பெற்றுத் தந்தன. சமீபத்தில் நடித்த ‘பிளாக்மெயில்’ திரைப்படம் ஓரளவு நேர்மறையான வரவேற்பை பெற்றது.

ஜிவி பிரகாஷ், சூரரைப் போற்று திரைப்படத்திற்காக சிறந்த இசையமைப்பாளருக்கான தேசிய விருதை பெற்றார். அதன் பின் தனுஷ் நடித்த ‘வாத்தி’ திரைப்படத்திற்கும் தேசிய விருது கிடைத்தது. இதனால் அவரது ரசிகர்கள் பெரும் மகிழ்ச்சியில் உள்ளனர்.

சமீபத்தில் அளித்த பேட்டியில் ஜிவி பிரகாஷ், ‘அசுரன்’ படத்தைப்பற்றி ஒரு சுவாரஸ்ய சம்பவத்தை பகிர்ந்தார்:“வெற்றிமாறன் எப்போதும் படம் எடுத்த பிறகு ஃபுட்டேஜை எனக்கு காண்பிப்பார். அசுரன் படத்தையும் காட்டியபோது, கென் கருணாஸ் கொஞ்சம் அதிக எடையுடன் இருந்தார்.

உடனே நான் வெற்றிமாறனிடம், ‘இவர் தனுஷின் மகனாகத் தெரியவில்லை, எடையை குறைத்து ரீஷூட் செய்யுங்கள்’ என்று கூறினேன். அவர் அதை ஏற்று செய்தார். நானும் வெற்றிமாறனும் நெருங்கிய நண்பர்கள். மற்றவர்களிடம் அவர் கடுமையாக இருந்தாலும், என் ஆபீஸுக்கு வந்துவிட்டால் இருவரும் ஒருவரின் புலம்பலை ஒருவர் கேட்போம்” என்றார்.

 இசையிலும், நடிப்பிலும் தொடர்ந்து தன்னைச் சவால் விடும் ஜிவி பிரகாஷ், ரசிகர்களுக்கு மேலும் பல நல்ல இசையையும் சிறந்த நடிப்பையும் வழங்குவார் என்ற எதிர்பார்ப்பு உருவாகியுள்ளது.