நடிகையும் அரசியல்வாதியுமான குஷ்பு மற்றும் இயக்குநர், நடிகரான சுந்தர் சி, தங்களது மூத்த மகள் அவந்திகாவின் திருமண அழைப்பிதழை இந்திய பிரதமர் நரேந்திர மோடி அவர்களிடம் நேரில் வழங்கியுள்ளனர். இந்தச் சந்திப்பு தொடர்பான புகைப்படங்கள் தற்போது சமூக வலைதளங்களில் வைரலாகி வருகின்றன.

தமிழ் சினிமாவின் முன்னணி நடிகைகளில் ஒருவராக 1990களில் புகழ்பெற்ற குஷ்பு, தமிழ், தெலுங்கு, மலையாளம் உள்ளிட்ட பல மொழிகளில் முன்னணி நடிகர்களுடன் இணைந்து நடித்துள்ளார். முறைமாமன் திரைப்படத்தின் போது இயக்குநர் சுந்தர் சியை காதலித்து திருமணம் செய்து கொண்டார். இந்தத் தம்பதிக்கு அவந்திகா மற்றும் அனந்திகா என இரண்டு மகள்கள் உள்ளனர்.

திருமணத்திற்குப் பிறகும் குஷ்பு அரசியலில் தீவிரமாக செயல்பட்டு வருகிறார். மறுபுறம், சுந்தர் சி தமிழ் சினிமாவின் வெற்றிகரமான இயக்குநர்களில் ஒருவராக தொடர்ந்து பல படங்களை இயக்கி வருகிறார். இவர்களின் இளைய மகள் அனந்திகா சமீபத்தில் திரைப்பட நடிகையாக அறிமுகமானது குறிப்பிடத்தக்கது.

மூத்த மகள் அவந்திகாவின் திருமணத்தை முன்னிட்டு, குஷ்பு தனது சமூக வலைதளப் பதிவில், டெல்லியில் பிரதமர் நரேந்திர மோடியை சந்தித்ததாக தெரிவித்துள்ளார். அந்தப் பதிவில், “எனது கணவர் சுந்தர் சி மற்றும் நான் இணைந்து, எங்கள் மகள் அவந்திகாவுக்கும் ஷ்ரவன் சீனிவாசனுக்கும் நடைபெறவுள்ள திருமணத்திற்கு பிரதமர் அவர்களை அழைத்தோம். அவர் மணமக்களை மனதார வாழ்த்தினார்” என்று குறிப்பிட்டுள்ளார்.

அவந்திகாவின் வருங்கால கணவரான ஷ்ரவன் சீனிவாசன் குறித்து இதுவரை விரிவான தகவல்கள் வெளியாகவில்லை. அவர் எந்தத் துறையைச் சேர்ந்தவர், என்ன தொழில் செய்து வருகிறார் என்பது பற்றிய விவரங்களும் அதிகாரப்பூர்வமாக அறிவிக்கப்படவில்லை.

மேலும், திருமண தேதி, நடைபெறும் இடம் உள்ளிட்ட தகவல்கள் விரைவில் வெளியாகும் என எதிர்பார்க்கப்படுகிறது. இதற்கிடையில், பிரதமருடன் குஷ்பு – சுந்தர் சி தம்பதியர் எடுத்துக்கொண்ட புகைப்படங்கள் சமூக வலைதளங்களில் பரவலாக பகிரப்பட்டு வருகின்றன. ரசிகர்கள் மற்றும் திரையுலகினர் பலரும் மணமக்களுக்கு வாழ்த்துகளைத் தெரிவித்து வருகின்றனர்.