இயக்குநர் ஏ. சற்குணம் இயக்கத்தில், அப்பாஸ், துஷாரா விஜயன், அதிதி பாலன் உள்ளிட்டோர் நடித்துள்ள “எக்ஸாம்” வெப் தொடர் தற்போது அமேசான் பிரைம் ஓடிடியில் வெளியாகியுள்ளது. புஷ்கர் - காயத்ரி தயாரிப்பில் உருவான இந்த தொடர், அரசு பணித் தேர்வுகளில் நடைபெறும் முறைகேடுகளை மையமாக வைத்து உருவாக்கப்பட்டுள்ளது.

இதற்கு முன் “சுழல்”, “வதந்தி” போன்ற வெற்றிகரமான வெப் தொடர்களை வழங்கிய வால் வாட்சர் பிலிம்ஸ் நிறுவனம் தயாரித்திருப்பதால், “எக்ஸாம்” மீது ரசிகர்களிடம் அதிக எதிர்பார்ப்பு இருந்தது. ஆனால் அந்த எதிர்பார்ப்பை முழுமையாக பூர்த்தி செய்கிறதா என்பது கேள்விக்குறியாகவே உள்ளது.

குரூப் 1, குரூப் 2 போன்ற அரசு போட்டித் தேர்வுகளில் நடைபெறும் முறைகேடுகள் மற்றும் அதன் பின்னணியில் இயங்கும் சக்திகளை மையமாகக் கொண்டு கதை நகர்கிறது. தேர்வு முறைகேட்டை ஒரு திரில்லர் கோணத்தில் சொல்ல முயற்சித்திருக்கிறார் இயக்குநர்.

துஷாரா விஜயன் தனது கதாபாத்திரத்தில் சிறப்பாக நடித்திருக்கிறார். ஆனால், அவர் இந்தக் கதைக்கு முழுமையாக பொருந்தியிருக்கிறாரா என்ற கேள்வி எழுகிறது. அதிதி பாலன் போலீஸ் அதிகாரியாக நடித்திருந்தாலும், பெரும்பாலான காட்சிகள் ஒரே அறைக்குள் நடைபெறுவதால் அந்த கதாபாத்திரத்தில் பெரிய தாக்கம் ஏற்படவில்லை.

அப்பாஸின் கதாபாத்திரம் சுவாரஸ்யமான வாய்ப்பு கொண்டிருந்தாலும், அதனை இன்னும் வலுவாக எழுதப்பட்டிருக்கலாம் என்ற உணர்வு ஏற்படுகிறது.

அரசு தேர்வு முறைகேடு போன்ற முக்கியமான பிரச்சினையை மையமாக எடுத்திருப்பது

சில இடங்களில் வரும் திரில்லர் அம்சங்கள்

துஷாரா விஜயனின் இயல்பான நடிப்பு

இந்த தொடரின் மிகப்பெரிய குறை ரைட்டிங். பல கதாபாத்திரங்களின் பின்னணி மற்றும் முடிவுகள் தெளிவாக இல்லாமல் போகின்றன. வில்லனின் பின்னணி மேலும் வலுவாக இருந்திருக்கலாம்.

தொடரின் பல காட்சிகள் ஏற்கனவே பார்த்த பல தமிழ் திரில்லர் படங்களையும், வெப் தொடர்களையும் நினைவூட்டுகின்றன. தேர்வு முறைகேடு என்ற மையக்கருவை ஆழமாக ஆராயாமல், சென்டிமென்ட் மற்றும் சோகக்காட்சிகளுக்கு அதிக முக்கியத்துவம் கொடுக்கப்பட்டிருப்பது கதையின் வேகத்தை குறைக்கிறது.

சாம் சி.எஸ் இசை பெரிய தாக்கத்தை ஏற்படுத்தவில்லை. சில காட்சிகளில் பின்னணி இசை கூட எதிர்பார்த்த அளவுக்கு வேலை செய்யவில்லை. ஒளிப்பதிவு மற்றும் மேக்கிங் சராசரியாக உள்ளது.

“சுழல்”, “வதந்தி” போன்ற தரமான வெப் தொடர்களின் வரிசையில் “எக்ஸாம்” சேரும் என எதிர்பார்த்தவர்களுக்கு இந்த தொடர் சற்று ஏமாற்றத்தை தரலாம். நல்ல கரு இருந்தும், திரைக்கதை மற்றும் எழுத்தில் பலவீனம் காரணமாக முழுமையான தாக்கத்தை ஏற்படுத்த முடியவில்லை.

இருப்பினும், சீசன் 2-க்கான லீட் இறுதியில் கொடுக்கப்பட்டுள்ளதால், அடுத்த பாகத்தில் மேலும் வலுவான கதை சொல்லல் வரும் என்ற நம்பிக்கை ரசிகர்களிடம் உள்ளது.