தென்னிந்திய சினிமாவில் தனித்துவமான நடிகராக அறியப்படும் பகத் பாசில், தனது பிளாக்பஸ்டர் படமான ஆவேசம்-ன் இரண்டாம் பாகம் உருவாகும் என்பதை அதிகாரப்பூர்வமாக உறுதிப்படுத்தியுள்ளார். இந்த அறிவிப்பால், ரசிகர்கள் மத்தியில் பெரும் உற்சாகம் ஏற்பட்டுள்ளது. குறிப்பாக ‘ரங்கா’ என்ற கேங்க்ஸ்டர் கதாபாத்திரம் மீண்டும் திரையில் தோன்றும் என்ற தகவல், சமூக வலைதளங்களில் வேகமாகப் பரவி வருகிறது.

மலையாள சினிமாவிலிருந்து வந்தாலும், தமிழ் திரைப்படங்களில் பகத் பாசில் தேர்வு செய்யும் கதாபாத்திரங்கள் எப்போதும் வித்தியாசமானவையாகவும், நினைவில் நிற்கும் வகையிலும் அமைந்துள்ளன. வேலைக்காரன் படத்தில் வில்லன் வேடத்தில் நடித்ததன் மூலம் தமிழில் பெரும் கவனம் பெற்ற அவர், அதன் பின்னர் சூப்பர் டீலக்ஸ், விக்ரம், மாமன்னன் போன்ற படங்களில் நடித்த ஒவ்வொரு கதாபாத்திரத்திலும் புதிய பரிமாணத்தை வெளிப்படுத்தினார். குறிப்பாக ‘விக்ரம்’ படத்தில் அவர் நடித்த ‘அமர்’ கதாபாத்திரம், அவரை தமிழகமெங்கும் அறியப்பட்ட நடிகராக மாற்றியது.

ஹீரோ, வில்லன் என்ற வரம்புகளைத் தாண்டி, கதைக்கு முக்கியத்துவம் தரும் பாத்திரங்களையே தேர்வு செய்வதே பகத் பாசிலின் தனிச்சிறப்பு. அதனாலேயே தமிழ் ரசிகர்களிடமும் அவர் ஒரு நம்பகமான நடிகராக இடம்பிடித்துள்ளார். மலையாளம், தமிழ், தெலுங்கு என மொழி எல்லைகளை கடந்து நடித்து வரும் அவர், சமீபத்தில் நடைபெற்ற ஒரு நிகழ்ச்சியில் தனது வரவிருக்கும் படங்கள் குறித்து பேசியது தற்போது வைரலாகி வருகிறது.

2024-ல் வெளியான ‘ஆவேசம்’ படத்தில், ‘ரங்கா’ என்ற கேங்க்ஸ்டர் கதாபாத்திரத்தில் பகத் பாசில் காட்டிய நடிப்பு ரசிகர்களை வெகுவாகக் கவர்ந்தது. ஆக்ஷன், காமெடி, ஸ்டைல் ஆகிய அனைத்தும் கலந்த அந்த படம், மலையாள சினிமாவில் அந்த ஆண்டின் முக்கிய வெற்றிப் படங்களில் ஒன்றாக மாறியது. இதன் தொடர்ச்சியாக இரண்டாம் பாகம் எப்போது என்ற கேள்வி நீண்ட காலமாக ரசிகர்களிடையே இருந்து வந்தது.

இந்த எதிர்பார்ப்புக்கு தற்போது நேரடியாக பதிலளித்துள்ள பகத் பாசில், ‘ஆவேசம் 2’ உருவாகும் என்பது உறுதி என்றும், ஆனால் அதற்கான அதிகாரப்பூர்வ அறிவிப்பு உடனடியாக இருக்காது என்றும் தெரிவித்துள்ளார். மேலும், இந்த படம் 2027 அல்லது 2028 ஆம் ஆண்டில் வெளியாக வாய்ப்பு உள்ளது எனவும் அவர் கூறியுள்ளார்.

இதனால், ‘ரங்கா’ கதாபாத்திரத்தை மீண்டும் திரையில் பார்க்க ரசிகர்கள் ஆவலுடன் காத்திருக்கத் தொடங்கியுள்ளனர். ‘ஆவேசம் 2’ குறித்த அதிகாரப்பூர்வ அறிவிப்பு எப்போது வெளியாகும் என்பதே தற்போது ரசிகர்களின் அடுத்த எதிர்பார்ப்பாக மாறியுள்ளது.