நாட்டின் முன்னணி எஸ்யூவி தயாரிப்பு நிறுவனமான மஹிந்திரா & மஹிந்திரா, அக்டோபர் 2025 மாத விற்பனை அறிக்கையை வெளியிட்டு பெரும் சாதனையை பதிவு செய்துள்ளது. இதுவரை இல்லாத அளவுக்கு, மொத்தம் 71,624 எஸ்யூவிகள் விற்பனை செய்யப்பட்டுள்ளன, இது நிறுவனத்தின் வரலாற்றிலேயே அதிகபட்ச மாதாந்திர விற்பனையாகும்.

மொத்த விற்பனை (உள்நாட்டு + ஏற்றுமதி) சேர்த்து 120,142 யூனிட்கள் விற்கப்பட்டுள்ளன. இது கடந்த ஆண்டு அக்டோபருடன் ஒப்பிடும்போது 26% வளர்ச்சி என்பதைக் குறிக்கிறது.

மஹிந்திரா எஸ்யூவிகளுக்கான தேவை இந்திய சந்தையில் தொடர்ந்து அதிகரித்து வருகிறது. அக்டோபர் 2024-ல் 54,504 யூனிட்கள் விற்கப்பட்டிருந்த நிலையில், இந்த ஆண்டில் 31% வளர்ச்சி பதிவு செய்துள்ளது. ஏப்ரல் முதல் அக்டோபர் 2025 வரை ஆண்டு அடிப்படையில் விற்பனை 17% உயர்ந்து 3,69,194 யூனிட்கள் என புதிய மைல்கல்லை எட்டியுள்ளது.

நிறுவனத்தின் பிரபலமான தார் (Thar), பொலிரோ (Bolero) மற்றும் பொலிரோ நியோ (Bolero Neo) மாடல்களின் புதிய பதிப்புகள் விற்பனையில் பெரும் தாக்கத்தை ஏற்படுத்தியுள்ளன. அதேபோல் XUV வரிசை மாடல்களும் இந்தியாவில் மிகுந்த வரவேற்பைப் பெற்றுள்ளன.

நிறுவனத்தின் CEO நளினிகாந்த் கோலகுண்டா இதுகுறித்து கூறியதாவது:“அக்டோபரில் எங்கள் எஸ்யூவி விற்பனை 71,624 யூனிட்களாக உயர்ந்துள்ளது. இது 31% வளர்ச்சியைச் சுட்டிக்காட்டுகிறது. மொத்த வாகன விற்பனை 120,142 யூனிட்கள் – இது கடந்த ஆண்டைவிட 26% அதிகம். எங்கள் வாடிக்கையாளர்கள் மீதான நம்பிக்கையும், புதிய மாடல்களின் தரமும் இதற்குக் காரணம்,”
என்று தெரிவித்துள்ளார்.

லைட் கமெர்ஷியல் வாகனங்கள் (LCV) பிரிவிலும் மஹிந்திரா உற்சாகமான வளர்ச்சியைப் பதிவு செய்துள்ளது.2 டன் க்குக் குறைவான LCV விற்பனை 16% உயர்ந்து 4,559 யூனிட்கள் ஆனது.2T – 3.5T பிரிவில் 14% வளர்ச்சியுடன் 27,182 யூனிட்கள் விற்கப்பட்டன.ஆண்டு அடிப்படையில் (YTD) LCV விற்பனை 13% உயர்ந்து 1,41,358 யூனிட்கள் எனப் பதிவு செய்யப்பட்டுள்ளது.

மேலும், மஹிந்திராவின் மூன்று சக்கர வாகனங்கள் மற்றும் எலக்ட்ரிக் வாகனங்களும் விற்பனை வளர்ச்சியில் பங்கெடுத்துள்ளன. 2024 அக்டோபரில் விற்கப்பட்ட 9,826 யூனிட்களுடன் ஒப்பிடும்போது, 2025 அக்டோபரில் 12,762 யூனிட்கள் விற்கப்பட்டு 30% வளர்ச்சி பதிவு செய்துள்ளன.

தற்போதைய விற்பனை வெற்றியைத் தொடர்ந்து, மஹிந்திரா நிறுவனம் 2026–27க்குள் இந்தியாவில் 8 புதிய எஸ்யூவிகளை அறிமுகப்படுத்தும் திட்டத்தையும் அறிவித்துள்ளது.மொத்தத்தில், மஹிந்திரா & மஹிந்திரா நிறுவனத்தின் அக்டோபர் மாத விற்பனை, இந்திய ஆட்டோமொபைல் துறையில் புதிய சாதனையை பதிவு செய்துள்ளது.