இந்தியாவின் மிட்-சைஸ் SUV சந்தையில் வேகமாக வளர்ச்சி பெற்று வரும் மாருதி சுசுகி விக்டோரிஸுக்கு போட்டியாக, ஹூண்டாய், ஹோண்டா மற்றும் ரெனால்ட் நிறுவனங்கள் தங்களது புதிய SUV மாடல்களை அறிமுகப்படுத்த தயாராகி வருகின்றன.

அறிமுகமான வெறும் எட்டு மாதங்களிலேயே ஒரு லட்சம் விற்பனையை எட்டிய விக்டோரிஸ், தற்போது மாருதி சுசுகியின் அதிகம் விற்பனையாகும் SUV-களில் ஒன்றாக மாறியுள்ளது. மாதந்தோறும் 10 ஆயிரத்திற்கும் அதிகமான யூனிட்கள் விற்பனையாகி வரும் நிலையில், இந்த பிரிவில் போட்டியும் தீவிரமடைந்துள்ளது.

ஹூண்டாய் நிறுவனம் தற்போது 'BC4i' என்ற குறியீட்டு பெயரில் புதிய மிட்-சைஸ் SUV-யை உருவாக்கி வருகிறது. சுமார் 4.18 மீட்டர் நீளமுள்ள இந்த மாடல், உலக சந்தையில் விற்பனையாகும் Bayon கிராஸ்ஓவரை அடிப்படையாகக் கொண்டு உருவாகும் என கூறப்படுகிறது.

இந்த SUV-யில் 1.5 லிட்டர் நேச்சுரலி ஆஸ்பிரேட்டட் பெட்ரோல் இன்ஜின் இடம்பெறலாம். மேனுவல் மற்றும் ஆட்டோமேட்டிக் கியர்பாக்ஸ் தேர்வுகளுடன், ஃபேக்டரி-ஃபிட்டட் CNG வெர்ஷனும் அறிமுகமாகும் என்று எதிர்பார்க்கப்படுகிறது. கிரெட்டாவை விட ஒரு படி கீழ் நிலை மாடலாக இது சந்தைப்படுத்தப்படலாம்.

2026-ல் ஹோண்டா தனது Elevate Facelift மாடலை அறிமுகப்படுத்த திட்டமிட்டுள்ளது. இதில் பெரிய வடிவமைப்பு மாற்றங்கள் இல்லாவிட்டாலும், புதிய LED ஹெட்லேம்ப்கள், மாற்றியமைக்கப்பட்ட முன்பக்கம், புதிய பம்பர் மற்றும் புதுப்பிக்கப்பட்ட உட்புற வசதிகள் இடம்பெறலாம்.

தற்போதைய 1.5 லிட்டர் பெட்ரோல் இன்ஜின் தொடரும் என்றும், 121 BHP பவருடன் மேம்படுத்தப்பட்ட இன்ஃபோடெயின்மென்ட் மற்றும் புதிய கேபின் அம்சங்கள் வழங்கப்படலாம் என்றும் தகவல்கள் தெரிவிக்கின்றன.

ரெனால்ட் நிறுவனம் தனது புதிய Duster Hybrid மாடலை இந்திய சந்தையில் அறிமுகப்படுத்த தயாராகி வருகிறது. இதில் 1.8 லிட்டர் பெட்ரோல் இன்ஜினுடன் இரண்டு எலக்ட்ரிக் மோட்டார்கள் மற்றும் 1.4 kWh லித்தியம்-அயன் பேட்டரி இணைக்கப்பட்ட ஹைப்ரிட் அமைப்பு இடம்பெறும்.

இந்த பவர்டிரெய்ன் சுமார் 160 BHP பவரை வழங்கும் என்று கூறப்படுகிறது. நகரப் பகுதிகளில் 80 சதவீதம் வரை எலக்ட்ரிக் மோடில் இயங்கும் திறன் கொண்டதாகவும், 8-ஸ்பீடு மல்டி-மோட் DHT கியர்பாக்ஸுடன் வரவுள்ளதாகவும் தகவல்கள் வெளியாகியுள்ளன.

ஹூண்டாய் கிரெட்டா, கியா செல்டோஸ், டொயோட்டா ஹைரைடர், ஹோண்டா எலிவேட், டாடா சியரா, ரெனால்ட் டஸ்டர் உள்ளிட்ட மாடல்கள் ஏற்கனவே இந்த பிரிவில் போட்டியிட்டு வரும் நிலையில், புதிய மாடல்களின் வருகையால் மிட்-சைஸ் SUV சந்தையில் போட்டி மேலும் அதிகரிக்கும் என எதிர்பார்க்கப்படுகிறது.

மாருதி விக்டோரிஸின் வேகமான வளர்ச்சிக்கு பதிலடி கொடுக்கும் வகையில் வரவிருக்கும் இந்த மூன்று SUV-களும், வாடிக்கையாளர்களுக்கு புதிய தேர்வுகளையும் நவீன தொழில்நுட்ப வசதிகளையும் வழங்கும் என ஆட்டோமொபைல் துறை வட்டாரங்கள் எதிர்பார்க்கின்றன.