தமிழ் சினிமாவில் தனது இனிமையான குரலால் பல ஹிட் பாடல்களை வழங்கிய பின்னணி பாடகி சின்மயி, கடந்த சில ஆண்டுகளாக தமிழ் திரையுலகில் பாடுவதற்கும், டப்பிங் பேசுவதற்கும் தடை செய்யப்பட்டுள்ளார். இது தொடர்பாக பல்வேறு ஊடகங்களில் விமர்சனங்களும், ரசிகர்கள் கேள்விகளும் எழுந்த நிலையில், நடிகரும் டப்பிங் யூனியனின் முன்னாள் தலைவருமான ராதா ரவி தற்போது விளக்கம் அளித்துள்ளார்.

‘கன்னத்தில் முத்தமிட்டால்’ படத்தின் “ஒரு தெய்வம் தந்த பூவே…” பாடல் மூலம் தமிழ் சினிமாவில் அறிமுகமான சின்மயி, பின்னர் நூற்றுக்கும் மேற்பட்ட பாடல்களை தமிழ், தெலுங்கு, கன்னடம், மலையாளம், இந்தி உள்ளிட்ட மொழிகளில் பாடி இருக்கிறார். அதோடு முன்னணி நடிகைகளுக்கு டப்பிங் கலைஞராகவும் பணியாற்றினார்.

அதற்கிடையில், சமூக வலைதளங்களில் வைரலான தகவல்களில், நடிகர் ராதாரவி தான் சின்மயிக்கு பாட தடை விதித்ததாக கூறப்பட்டது. ஆனால் இதற்கு ராதாரவி நேரடியாக மறுப்பு தெரிவித்துள்ளார்.

தற்போது அவர் அளித்த பேட்டியில், "சின்மயிக்கு பாட தடை விதித்தது நானல்ல. டப்பிங் யூனியனுக்கும், மியூசிக் யூனியனுக்கும் எந்த தொடர்பும் இல்லை. சினிமா துறையில் 200-க்கும் மேற்பட்ட யூனியன்கள் இருக்கின்றன. நான் டப்பிங் யூனியனுக்கே மட்டுமே பொறுப்பானவன். பாடல் சார்ந்த முடிவுகளை மியூசிக் யூனியன் தான் எடுக்கும். ஆனால் சிலர் உண்மை தெரியாமலே என்னை குற்றம் சுமத்தி பேசுகிறார்கள்," என்றார்.

அவர் மேலும் கூறியதாவது, “தூங்குபவர்களை எழுப்பலாம், தூங்குவது போல நடிப்பவர்களை எழுப்ப முடியாது. அதுபோலத்தான் ஒவ்வொரு இடத்திலும் என்னிடம் சின்மயிக்கு தடை வைத்தீர்களா என்று கேட்கிறார்கள். இது உண்மையல்ல. அவருக்கு தடை விதிக்க முடியும் எனும் அதிகாரம் எனக்கில்லை. மியூசிக் யூனியனுக்கே அந்த அதிகாரம் உண்டு” என தெரிவித்தார்.

இதேவேளை, சில ஆண்டுகளுக்கு முன் சின்மயி, கவிஞர் வைரமுத்துவுக்கு எதிராக மீடூ புகார் எழுப்பியதும், இதனைத் தொடர்ந்து தான் திரையுலகில் வாய்ப்புகள் குறைந்தன என்றும் பரபரப்பான விவாதங்கள் நடைபெற்றன.

சமீபத்தில், ‘தக் லைஃப்’ திரைப்பட இசை வெளியீட்டில் “முத்த மழை” பாடலை சின்மயி பாடியது நெட்டிசன்களிடம் பெரும் வரவேற்பைப் பெற்றது. அப்பாடலை உண்மையில் பாடியிருந்த பாடகி தீ ஆல்தியால் விழாவிற்கு வர முடியாத காரணத்தால் சின்மயி அதனை பாடியிருந்தார். இந்த நிகழ்வு மீண்டும் அவருடைய திறமையை நினைவூட்டியது.

முன்னதாக இதே விவகாரத்தில் பேசியிருந்த ராதாரவி, “டப்பிங் யூனியனுக்கு செலுத்த வேண்டிய ஆண்டு சந்தா தொகையை செலுத்தாமல், சின்மயி நேரடியாக நீதிமன்றத்தை நாடியதனால் பிரச்சனை உருவானது” என்றும் தெரிவித்திருந்தார்.

இந்தச் சூழலில், சின்மயிக்கு எதிரான தடை யாரால், எப்போது, என்ன காரணத்திற்காக ஏற்பட்டது என்பது தொடர்பாக தெளிவான பதிலை ராதாரவி தற்போது வழங்கியிருக்கிறார்.

இதன் மூலம் பல ஆண்டுகளாக சின்மயிக்கு ஏன் வாய்ப்பு மறுக்கப்பட்டார் என்பதற்கான ஒரு பக்கம் வெளிச்சத்தில் வந்துள்ளதுடன், அவரது ரசிகர்கள் மற்றும் திரைநிகழ்வாளர்கள் இதற்கெதிராக மேலும் சிந்திக்கத் தொடங்கியுள்ளனர்.