தமிழ்நாடு முதலமைச்சர் மு.க. ஸ்டாலின் தனது எக்ஸ் தள பதிவில் கடும் எதிர்ப்பை வெளிப்படுத்தியுள்ளார். அவர் கூறியதாவது,'கோவை மெட்ரோ திட்டத்தை மறுத்துவிட்டு, எவ்விதத் தடையும் தோன்றாதபடி கோவைக்கு விஜயம் செய்த பிரதமரின் உரையின் ஈரம் கூட காயாத நிலையில், அடுத்த அதிர்ச்சி முடிவை ஒன்றிய பா.ஜ.க அரசு எடுத்துள்ளது.

கனமழை காரணமாக நெல் ஈரப்பதம் அதிகரித்துள்ள சூழலில், விவசாயிகளை காப்பாற்ற நெல்லின் ஈரப்பத தளர்வை வழங்க வேண்டும் என்ற தமிழ்நாட்டின் நியாயமான கோரிக்கையை ஒன்றிய அரசு முற்றாக நிராகரித்துள்ளது. விவசாயிகள் எழுப்பிய வேதனைக்குரல் பிரதமரின் காதுகளுக்கு ஏன் சென்று சேரவில்லை?

கடந்த ஆண்டுகளில் தமிழ்நாடு கோரியபோதே இதே தளர்வை வழங்கிய ஒன்றிய அரசு, இப்போது மறுப்பதற்கு என்ன காரணம்? ஏன் இந்த உத்தரவு மட்டும் தமிழ்நாட்டின் மீது கடுமையானதாக மாறியுள்ளது?
மழையால் பாதிக்கப்பட்ட பயிர்களுக்கு நிவாரணம் வழங்காமல், ஈரப்பத தளர்வையும் உயர்த்த மறுப்பது விவசாயிகளின் நன்மைக்கா?

அவர்களின் நெஞ்சை நெருக்கும் புதிய சுமையா?“தமிழ்நாடு முன்வைக்கும் கோரிக்கைகளை ஒன்றிய அரசு உடனடியாக மறுபரிசீலனை செய்து, விவசாயிகள் வாழ்வில் ஒளி கொளுத்தும் நேர்மையான முடிவை எடுக்க வேண்டும்” என்று முதலமைச்சர் ஸ்டாலின் வலியுறுத்தியுள்ளார்.