அமெரிக்க அதிபர் டொனால்டு டிரம்பிற்கு கத்தார் அரச குடும்பத்தினர் அதீத சொகுசு வசதிகள் கொண்ட அதிநவீன விமானம் ஒன்றை அன்பளிப்பாக வழங்கியுள்ளனர். 'ஏர் போர்ஸ் ஒன்' (Air Force One) என மறுவடிவமைப்பு செய்யப்பட்ட இந்த ‘போயிங் 747-8’ ரக விமானத்தின் அறிமுக விழா, மேரிலேண்டில் உள்ள கூட்டு ராணுவத் தளத்தில் கோலாகலமாக அரங்கேறியது.

இந்த நிகழ்வில் பங்கேற்று வான்வழிச் சேவையைத் தொடங்கி வைத்த அதிபர் டிரம்ப், அதன் வியக்கவைக்கும் வடிவமைப்பு மற்றும் அசாத்திய திறன்களைப் பாராட்டிப் பேசினார்.யாரும் கற்பனை செய்து பார்க்க முடியாத அதிரடி வேகத்தில், வெறும் 10 மாதங்களுக்குள் இந்த பிரம்மாண்ட விமானம் முற்றிலும் உருமாற்றப்பட்டு பயன்பாட்டிற்கு கொண்டு வரப்பட்டுள்ளது.

இதுவரை உலகம் கண்டிராத ஆடம்பர வசதிகளுடன், வானில் பறக்கும் ஒரு ‘வெள்ளை மாளிகை’ போலவே இது காட்சியளிப்பதாக டிரம்ப் பெருமிதத்துடன் புகழாரம் சூட்டியுள்ளார்.அதே வேளையில், இந்த விலையுயர்ந்த பரிசு ஒரு மறைமுக லஞ்சம் என்று அந்நாட்டு எதிர்க்கட்சிகள் கடுமையாகக் குற்றம் சாட்டியுள்ளன.

ஆனால் இக்குற்றச்சாட்டை மறுத்துள்ள அமெரிக்க பாதுகாப்புத் துறை, இந்த விவகாரத்தில் லஞ்சத்திற்கான எவ்வித விதிமீறல்களும் இல்லை என்றும், அமெரிக்க அரசியலமைப்புச் சட்டம் இத்தகைய பரிசுகளைத் தடை செய்யவில்லை என்றும் விளக்கமளித்துள்ளது.இந்த வானூர்தி அதிபர் டொனால்டு டிரம்பின் தனிப்பட்ட சொத்து அல்ல என்றும், அமெரிக்க விமானப் படைக்காகவே இது வழங்கப்பட்டுள்ளது என்றும் தெரிவிக்கப்படுகிறது.

அதிபரின் பதவிக்காலத்திற்குப் பிறகு இது ‘அதிபர் நூலக அறக்கட்டளை’ வசம் ஒப்படைக்கப்படும். சுமார் 3,413 கோடி ரூபாய் மதிப்புள்ள இந்த வான் அரண்மனையில், சொகுசுப் படுக்கையறைகள், நவீன ஓய்வறைகள், உயர்மட்டக் கலந்தாய்வுக் கூடங்கள், விலைமதிப்பற்ற பளிங்குத் தரை பதிக்கப்பட்ட குளியலறைகள் மற்றும் பிரம்மாண்ட படிக்கட்டுகள் என வியப்பூட்டும் அம்சங்கள் நிறைந்துள்ளன.

கடந்த காலத்தில், "இந்த மெகா பரிசின் பின்னணியில் கத்தார் உங்களிடம் ஏதேனும் கைம்மாறு எதிர்பார்த்ததா?" என்று செய்தியாளர்கள் எழுப்பிய கேள்விக்கு டிரம்ப் ஆவேசமாகப் பதிலளித்துள்ளார். "இப்படி ஒரு கேள்வியைக் கேட்பதற்கே நீங்கள் வெட்கப்பட வேண்டும். இது கத்தார் நாட்டின் ஒரு உன்னதமான செயல்.

இவ்வளவு மதிப்புமிக்க ஒரு பரிசை வேண்டாம் என்று மறுப்பதற்கு நான் ஒன்றும் முட்டாள் அல்ல. சவூதி அரேபியா, ஐக்கிய அரபு அமீரகம், கத்தார் போன்ற நாடுகளுக்கு அமெரிக்கா எப்போதும் தார்மீக ரீதியாக உதவி வருகிறது, அது தொடரும்" என்று அவர் தெளிவுபடுத்தியுள்ளார்.

அமெரிக்க அதிபரின் அதிகாரப்பூர்வ பாதுகாப்புத் தரத்திற்கு இந்த சொகுசு விமானம் ஈடுகொடுக்குமா என்ற விவாதம் எழுந்த நிலையில், அணு ஆயுதத் தாக்குதல்களைத் தாங்கும் திறன், ஏவுகணை எதிர்ப்பு தொழில்நுட்பம் மற்றும் வானிலேயே எரிபொருள் நிரப்பும் வசதி போன்ற மிக முக்கிய பாதுகாப்பு அம்சங்களும் இதில் சேர்க்கப்பட உள்ளதாகத் தெரிவிக்கப்படுகிறது.

இந்த புதிய வானூர்தியின் வால் பகுதியில் அமெரிக்காவின் தேசியக் கொடி கம்பீரமாகப் பொறிக்கப்பட்டுள்ளது. இனிவரும் காலங்களில் அதிபர் டிரம்ப் இதில்தான் உலக நாடுகளுக்குப் பயணம் மேற்கொள்வார். இதன் மூலம், ஜார்ஜ் டபிள்யூ புஷ் காலம் தொட்டு கடந்த 40 ஆண்டுகளாக அமெரிக்க அதிபர்களைச் சுமந்து சென்ற பழைய விண்வெளி வாகனத்திற்கு அதிகாரப்பூர்வமாக விடை கொடுக்கப்பட்டுள்ளதாகத் தெரிவிக்கப்படுகிறது.