சென்னை வானிலை ஆய்வு மையம் வெளியிட்டுள்ள புதிய அறிக்கையில்," தமிழக வானிலை நிலவரம் குறித்து முக்கிய தகவல்கள் தெரிவிக்கப்பட்டுள்ளன. அதன்படி, கேரள கடலோர பகுதிகளுக்கு அப்பால் உள்ள தென்கிழக்கு அரபிக்கடல் பகுதிகளில் ஒரு வளிமண்டல மேலடுக்கு சுழற்சி நிலவி வருகிறது. இதேபோல், தென்கிழக்கு வங்கக்கடல் பகுதிகளிலும், தெற்கு கடலோர ஆந்திர பிரதேசம் மற்றும் அதனை ஒட்டிய பகுதிகளிலும் வளிமண்டல கீழடுக்கு சுழற்சிகள் காணப்படுகின்றன. இவை தமிழக வானிலையில் மாற்றங்களை ஏற்படுத்தக்கூடும் என தெரிவிக்கப்பட்டுள்ளது.

டிசம்பர் 29, 2025
டெல்டா மாவட்டங்களில் ஓரிரு இடங்களிலும், காரைக்கால் பகுதிகளிலும் லேசானது முதல் மிதமான மழை பெய்ய வாய்ப்பு உள்ளது. மற்ற தமிழக பகுதிகள் மற்றும் புதுவையில் வறண்ட வானிலை நிலவும். இரவு மற்றும் அதிகாலை நேரங்களில் சில இடங்களில் லேசான பனிமூட்டம் காணப்படக்கூடும்.
டிசம்பர் 30, 2025
மேற்கு தொடர்ச்சி மலை மாவட்டங்கள் மற்றும் தென் தமிழக பகுதிகளில் ஓரிரு இடங்களில் லேசானது முதல் மிதமான மழை பெய்ய வாய்ப்பு உள்ளது. இதர தமிழக பகுதிகள், புதுவை மற்றும் காரைக்கால் பகுதிகளில் வறண்ட வானிலை தொடரும். இரவு மற்றும் அதிகாலை வேளையில் பனிமூட்டம் ஏற்பட வாய்ப்புள்ளதாக எச்சரிக்கை விடுக்கப்பட்டுள்ளது.
குறைந்தபட்ச வெப்பநிலை முன்னறிவிப்பு
டிசம்பர் 29 முதல் 31 வரை, தமிழக, புதுவை மற்றும் காரைக்கால் பகுதிகளில் குறைந்தபட்ச வெப்பநிலையில் பெரிய மாற்றம் ஏற்பட வாய்ப்பு குறைவு என வானிலை ஆய்வு மையம் தெரிவித்துள்ளது. இருப்பினும், சில இடங்களில் குறைந்தபட்ச வெப்பநிலை இயல்பை விட 2 முதல் 3 டிகிரி செல்சியஸ் வரை குறையக்கூடும்.
உறைபனி எச்சரிக்கை
டிசம்பர் 29 மற்றும் 30-ஆம் தேதிகளில், நீலகிரி மாவட்டம் மற்றும் கொடைக்கானல் மலைப்பகுதிகளில் (திண்டுக்கல் மாவட்டம்) ஓரிரு இடங்களில் இரவு மற்றும் அதிகாலை வேளைகளில் உறைபனி ஏற்படும் வாய்ப்பு உள்ளதாக எச்சரிக்கை விடுக்கப்பட்டுள்ளது.
சென்னை மற்றும் புறநகர் பகுதிகளுக்கான வானிலை
இன்று:
வானம் ஓரளவு மேகமூட்டத்துடன் காணப்படும். இரவு மற்றும் அதிகாலை நேரங்களில் சில பகுதிகளில் லேசான பனிமூட்டம் உருவாகலாம்.
அதிகபட்ச வெப்பநிலை: 28–29°C
குறைந்தபட்ச வெப்பநிலை: 21–22°C
நாளை:
வானம் ஓரளவு மேகமூட்டத்துடன் காணப்படும். இரவு மற்றும் அதிகாலை வேளைகளில் பனிமூட்டம் தொடர வாய்ப்பு உள்ளது.
அதிகபட்ச வெப்பநிலை: 29–30°C
குறைந்தபட்ச வெப்பநிலை: 21–22°C
இவ்வாறு சென்னை வானிலை ஆய்வு மையம் தனது அறிக்கையில் தெரிவித்துள்ளது