சென்னை வானிலை ஆய்வு மையம் வெளியிட்டுள்ள சமீபத்திய அறிக்கையில், தென் தமிழகம் மற்றும் அதனை ஒட்டிய பகுதிகளின் மேல் வளிமண்டலத்தின் கீழடுக்கு சுழற்சி ஒன்று நிலவுவதாக தெரிவித்துள்ளது. இதன் காரணமாக, வரவிருக்கும் நாட்களில் தமிழகத்தின் பல பகுதிகளில் மாறுபட்ட வானிலை நிலவ வாய்ப்புள்ளதாக கூறப்பட்டுள்ளது.
டிசம்பர் 15, 2025:
கடலோர தமிழகத்தின் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும். உள் தமிழக பகுதிகளில் பெரும்பாலும் வறண்ட வானிலை காணப்படும். தமிழகம், புதுவை மற்றும் காரைக்கால் பகுதிகளில் அதிகாலை நேரங்களில் சில இடங்களில் லேசான பனிமூட்டம் தென்படும்.

டிசம்பர் 16, 2025:
தமிழகத்தின் ஒருசில பகுதிகளிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழைக்கு வாய்ப்பு உள்ளது.
டிசம்பர் 17, 2025:
தென் தமிழகத்தின் சில பகுதிகளிலும், வட தமிழகத்தின் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய மிதமான மழை பெய்யக்கூடும்.
குறைந்தபட்ச வெப்பநிலை முன்னறிவிப்பு:
டிசம்பர் 15-ஆம் தேதி, தமிழகத்தின் ஓரிரு பகுதிகளில் குறைந்தபட்ச வெப்பநிலை இயல்பை விட 2 முதல் 3 டிகிரி செல்சியஸ் வரை குறையக்கூடும்.
டிசம்பர் 16 மற்றும் 17-ஆம் தேதிகளில், தமிழகம், புதுவை மற்றும் காரைக்கால் பகுதிகளில் குறைந்தபட்ச வெப்பநிலையில் குறிப்பிடத்தக்க மாற்றம் இருக்காது.
சென்னை மற்றும் புறநகர் பகுதிகளுக்கான வானிலை:
இன்று: வானம் ஓரளவு மேகமூட்டத்துடன் காணப்படும். நகரின் சில பகுதிகளில் லேசான மழை பெய்யக்கூடும். அதிகாலை வேளையில் ஓரிரு இடங்களில் லேசான பனிமூட்டம் காணப்படும். அதிகபட்ச வெப்பநிலை 29–30° செல்சியஸ், குறைந்தபட்ச வெப்பநிலை 20–21° செல்சியஸ் அளவில் இருக்கும்.நாளை: வானம் பகுதியளவில் மேகமூட்டத்துடன் காணப்படும். நகரின் சில பகுதிகளில் இடி, மின்னலுடன் கூடிய லேசானது முதல் மிதமான மழை பெய்யக்கூடும். அதிகபட்ச வெப்பநிலை சுமார் 30° செல்சியஸ், குறைந்தபட்ச வெப்பநிலை 21–22° செல்சியஸ் அளவில் இருக்கும் என வானிலை ஆய்வு மையம் தெரிவித்துள்ளது.