சென்னை: தென்மேற்கு வங்கக்கடலில் தற்போது நிலவும் காற்றழுத்தத் தாழ்வுப் பகுதியின் நகர்வால் தமிழகத்தில் மழை பெய்யும் நிலையில், மேலும் ஒரு புதிய காற்றழுத்தத் தாழ்வுப் பகுதி நவம்பர் 22-ஆம் தேதி உருவாக வாய்ப்புள்ளதாக இந்திய வானிலை ஆய்வு மையம் (IMD) தெரிவித்துள்ளது.

இந்த புதிய காற்றழுத்தத் தாழ்வுப் பகுதியானது தென்-கிழக்கு வங்கக்கடலில் உருவாகி, மேற்கு-வடமேற்கு திசையை நோக்கி நகர்ந்து, அடுத்த 48 மணி நேரத்தில் மேலும் வலுப்பெற வாய்ப்புள்ளது.

மழை முன்னறிவிப்பு

இலங்கையை ஒட்டிய தென்மேற்கு வங்கக்கடலில் நிலவும் தற்போதைய காற்றழுத்தத் தாழ்வுப் பகுதி, அடுத்த 24 மணி நேரத்தில் மேற்கு-வடமேற்கு திசையை நோக்கி நகரும் என எதிர்பார்க்கப்படுகிறது. இதன் காரணமாக இன்று (நவ. 17):

கன முதல் மிக கனமழை: சென்னை, செங்கல்பட்டு, திருவள்ளூர், காஞ்சிபுரம், மயிலாடுதுறை, நாகப்பட்டினம், திருவாரூர் மாவட்டங்கள் மற்றும் காரைக்கால் பகுதிகளில் ஓரிரு இடங்களில் பெய்ய வாய்ப்புள்ளது.

கனமழை: கடலூர், விழுப்புரம், தஞ்சாவூர், புதுக்கோட்டை, ராமநாதபுரம், தூத்துக்குடி, திருநெல்வேலி, கன்னியாகுமரி மாவட்டங்கள் மற்றும் புதுவையிலும் பெய்ய வாய்ப்புள்ளது.

புதிய காற்றழுத்தத் தாழ்வுப் பகுதி​

நவம்பர் 22-ஆம் தேதி உருவாகும் புதிய காற்றழுத்தத் தாழ்வுப் பகுதியின் தாக்கத்தால், நவம்பர் 21 மற்றும் 22 ஆகிய தேதிகளில் கடலோர மற்றும் டெல்டா மாவட்டங்களில் மிக கனமழைக்கு வாய்ப்புள்ளதாக வானிலை ஆய்வு மையம் எச்சரித்துள்ளது.