தமிழகத்தில் நிலவும் வளிமண்டல மாற்றங்களின் காரணமாக, மாநிலத்தின் ஒருசில பகுதிகளிலும் புதுச்சேரி மற்றும் காரைக்கால் பகுதிகளிலும் இன்று லேசானது முதல் மிதமான மழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.தமிழக கடலோரப் பகுதிகளையொட்டிய கீழடுக்கு வளிமண்டலத்தில் பலவீனமான காற்றழுத்தத் தாழ்வுப் பாதை நிலவி வருகிறது.

இதன் தாக்கத்தால் மேற்கு தொடர்ச்சி மலைப் பகுதிகளை ஒட்டிய மாவட்டங்களில் இன்று சில இடங்களில் இடி, மின்னலுடன் மிதமான மழை பெய்யக்கூடும்.மேலும், மழையின்போது மணிக்கு 40 முதல் 50 கிலோமீட்டர் வேகத்தில் பலத்த காற்றும் வீசக்கூடும் என தெரிவிக்கப்பட்டுள்ளது.

இதேபோல், தமிழகத்தின் பிற பகுதிகளில் ஓரிரு இடங்களிலும், புதுச்சேரி மற்றும் காரைக்கால் பகுதிகளிலும் இடி, மின்னல் மற்றும் பலத்த காற்றுடன் லேசானது முதல் மிதமான மழை பெய்யக்கூடும் என வானிலை ஆய்வு மையம் தெரிவித்துள்ளது.

இதற்கிடையில், வடமேற்கு வங்கக்கடல் பகுதியில் நிலவி வந்த வளிமண்டல மேலடுக்கு சுழற்சி தற்போது காற்றழுத்த தாழ்வு பகுதியாக வலுப்பெற்றுள்ளதாக இந்திய வானிலை ஆய்வு மையம் தெரிவித்துள்ளது.மேற்கு வங்காளம் மற்றும் வங்கதேச கடற்கரையை ஒட்டிய வங்கக்கடல் பகுதியில் இந்த காற்றழுத்த தாழ்வு பகுதி உருவாகியுள்ளது.

அடுத்த 48 மணி நேரத்தில் இது மேலும் வலுப்பெற்று, வடமேற்கு திசையில் நகரக்கூடும் என வானிலை ஆய்வு மையம் கணித்துள்ளது.

வங்கக்கடலில் உருவாகியுள்ள இந்த காற்றழுத்த தாழ்வு பகுதியின் தாக்கத்தால் வடக்கு மற்றும் வடமேற்கு மாநிலங்கள் மட்டுமின்றி, கடலோரப் பகுதிகளிலும் தென்மேற்கு பருவமழை மேலும் தீவிரமடைய வாய்ப்புள்ளதாக கணிக்கப்பட்டுள்ளது.

இதன் காரணமாக அடுத்த சில நாட்களில் பல்வேறு பகுதிகளில் மழைப்பொழிவில் மாற்றங்கள் ஏற்படக்கூடும் என்பதால், பொதுமக்கள் வானிலை அறிவிப்புகளை தொடர்ந்து கவனிக்குமாறு அறிவுறுத்தப்படுகின்றனர்.