புற்றுநோய் சிகிச்சை துறையில் புரட்சியை ஏற்படுத்தக்கூடிய ஒரு அதிரடி அறிவிப்பு வெளியாகியுள்ளது.
கூகுள் டீப்மைண்ட் உருவாக்கிய செயற்கை நுண்ணறிவு “Gemma” புற்றுநோய் உயிரணுக்கள் குறித்த புதிய கருதுகோளை உருவாக்கியுள்ளது. இதை கூகுள் தலைமை நிர்வாக அதிகாரி சுந்தர் பிச்சை நேரடியாக பாராட்டியுள்ளார்.

அவர் கூறியதாவது – “இது மிகவும் மகிழ்ச்சியான மைல்கல். AI மூலமாக புற்றுநோய்க்கு எதிரான புதிய வழிகளைத் திறக்கலாம் என்ற நம்பிக்கையை இது தருகிறது” எனக் கூறினார்.

இந்தச் செயற்கை நுண்ணறிவு கண்டுபிடிப்பு, கூகுள் டீப்மைண்ட் மற்றும் யேல் பல்கலைக்கழகம் இணைந்து மேற்கொண்ட ஆய்வில் உருவானது. இந்த ஆய்வு, புற்றுநோய் சிகிச்சைகளுக்கான புதிய அணுகுமுறையை உருவாக்கும் ஒரு முக்கிய அடித்தளமாக பார்க்கப்படுகிறது.

சுந்தர் பிச்சை தனது X பக்கத்தில், “C2S-Scale 27B” எனப்படும் இந்த AI மாதிரி, புற்றுநோய் உயிரணுக்களின் நடத்தை பற்றி ஒரு புதிய கருதுகோளை உருவாக்கியுள்ளது. அதிலும் சிறப்பு என்னவெனில் – இந்தக் கருதுகோள் ஆய்வகத்தில் உயிருள்ள செல்களில் சோதனை செய்யப்பட்டு யதார்த்தமாக உறுதிப்படுத்தப்பட்டுள்ளது!

அதாவது, AI உருவாக்கிய கருத்து, வெறும் கணிப்பு அல்ல – நிஜத்தில் செயலில் நிரூபிக்கப்பட்டது!

இந்த வெற்றியைப் பற்றி பிச்சை கூறியதாவது, “இது அறிவியலிலும் மருத்துவத்திலும் செயற்கை நுண்ணறிவின் பங்களிப்பை புதிய உயரத்திற்கு கொண்டு செல்கிறது. எதிர்காலத்தில், இதன் அடிப்படையில் புற்றுநோய் சிகிச்சைகளுக்கான புதிய மருந்துகள் உருவாகலாம்” என்றார்.

அதே நேரத்தில், விஞ்ஞானிகளும் தொழில்நுட்ப வல்லுநர்களும் இந்த முன்னேற்றத்தை மிகுந்த உற்சாகத்துடன் வரவேற்றுள்ளனர். ஒரு முன்னாள் கூகுள் பொறியாளர், “இது தான் AI-இன் உண்மையான சமூக பங்களிப்பு. பொழுதுபோக்கு அல்லது தானியங்கி வேலைகளுக்கு அப்பால், மனித உயிர்களை காப்பாற்றும் தொழில்நுட்பமாக AI வளர்கிறது” எனக் குறிப்பிட்டார்.

டீப்மைண்ட் ஆராய்ச்சியாளர்களும் தங்கள் வலைப்பதிவில் இதை உறுதி செய்துள்ளனர். அவர்கள், “Cell2Sentence-Scale 27B” என்ற அடிப்படை மாதிரி ஒற்றைச் செல் பகுப்பாய்வுக்காக வடிவமைக்கப்பட்டுள்ளது என்றும், புற்றுநோய் செல்களின் நடத்தை பற்றி புதிய விஞ்ஞான அடிப்படை கொள்கைகளை உருவாக்கியுள்ளது என்றும் தெரிவித்துள்ளனர்.

இந்தக் கண்டுபிடிப்பு வெற்றிகரமாக மருத்துவ சோதனைகளை கடந்து சென்றால், எதிர்காலத்தில் புற்றுநோய்க்கான சிகிச்சையில் ஒரு முழுமையான புதிய திசை திறக்கப்படும் என்று நம்பப்படுகிறது.

கூகுள் டீப்மைண்ட் நிறுவனம் இதன் மூலம் செயற்கை நுண்ணறிவை மனித நலனுக்காக பயன்படுத்தும் துறையில் ஒரு பெரிய முன்னேற்றத்தை அடைந்துள்ளது.