கன்னட திரையுலகில் மாபெரும் வெற்றியைப் பதிவு செய்து வரும் ‘காந்தாரா சாப்டர் 1’ தற்போது பாக்ஸ் ஆபிஸில் அதிரடி வசூலைத் தொடர்கிறது. வெறும் 14 நாட்களில் இப்படம் ரூ.717.50 கோடி வசூல் செய்து ரசிகர்களை ஆச்சரியத்தில் ஆழ்த்தியுள்ளது. இதன் வேகத்தைக் கருத்தில் கொண்டால், விரைவில் ரூ.1000 கோடி கிளப்பை அடையும் என எதிர்பார்க்கப்படுகிறது.

இதற்கு முன்னதாக அல்லு அர்ஜுன் நடித்த ‘புஷ்பா 2’ படம் ரூ.1000 கோடிக்கும் மேலான வசூலைக் குவித்திருந்தது. ஆனால், காந்தாரா சாப்டர் 1 படம் அதைவிட அதிக லாப சதவீதத்தைக் காட்டி தற்போது பேசுபொருளாகி வருகிறது.

கொய்மொய் இணையதளத்தின் தகவலின்படி, ‘புஷ்பா 2’ ரூ.500 கோடி பட்ஜெட்டில் உருவாகி, உலகளவில் ரூ.1742 கோடி வசூலித்தது. அதாவது, அதன் பட்ஜெட்டில் இருந்து 348.42% லாபத்தை ஈட்டியது. ஆனால் ‘காந்தாரா சாப்டர் 1’ படம் வெறும் ரூ.125 கோடியில் தயாரிக்கப்பட்டு, இதுவரை ரூ.717.50 கோடி வசூலித்துள்ளது — அதாவது பட்ஜெட்டைவிட சுமார் 545% அதிக லாபம்!

இப்படம் தற்போது திரையரங்குகளில் வெற்றிகரமாக ஓடிக்கொண்டிருப்பதால், மொத்த வசூல் ரூ.1000 கோடியைத் தாண்டும் என வணிக வட்டாரங்கள் நம்பிக்கை தெரிவிக்கின்றன.

2022-ல் வெளியாகி சூப்பர் ஹிட்டான ‘காந்தாரா’ படத்தின் தொடர்ச்சியாக உருவான இந்த அத்தியாயம், ரிஷப் ஷெட்டி இயக்கத்தில் வெளிவந்துள்ளது. ரிஷப் ஷெட்டி தானே கதாநாயகனாக நடித்துள்ளார். இவருடன் ருக்மிணி வசந்த் மற்றும் குல்ஷன் தேவையா முக்கிய வேடங்களில் நடித்துள்ளனர்.

குறைந்த பட்ஜெட்டில் உருவாகி, பாக்ஸ் ஆபிஸில் பெரும் வெற்றி பெற்றுள்ள ‘காந்தாரா சாப்டர் 1’ கன்னட சினிமாவுக்கு ஒரு புதிய உயரத்தைப் பெற்றுத்தந்துள்ளது. இதன் வெற்றியால், இந்திய திரையுலகில் கன்னட படங்களின் வலிமை மீண்டும் நிரூபிக்கப்பட்டுள்ளது.