2001ஆம் ஆண்டு ஜூன் 29ஆம் தேதி — தமிழ்நாட்டு அரசியலை உலுக்கிய இரவு. அன்றைய முதல்வர் ஜெயலலிதா ஆட்சிக்காலத்தில், திமுக தலைவர் கருணாநிதி நள்ளிரவிலேயே கைது செய்யப்பட்டார். அந்த அதிர்ச்சியூட்டும் சம்பவம் மீண்டும் அரசியல் பேசுபொருளாகியுள்ளது.

தவெகவின் பொதுக்குழு கூட்டத்தில் பேசும் போது, அந்த சம்பவத்தை மீண்டும் உயிர்ப்பித்தது போல் கடும் விமர்சனங்கள் எழுந்துள்ளன.

தவெகவின் தேர்தல் மேலாண்மை பிரிவு பொதுச்செயலாளர் ஆதவ் அர்ஜுனா, கூட்டத்தில் உரையாற்றும்போது, “கரூர் சம்பவத்திற்குப் பிறகு நிர்மல் குமார் ஓடிவிட்டார் என்கிறார்கள். ஆனால் கலைஞர் கைதானபோது, நீங்கள் (ஸ்டாலின்) தான் ஓடியது அல்லவா?” என்று சாடியுள்ளார்.அவரது இந்த விமர்சனம் அரசியல் வட்டாரங்களில் பெரிய சர்ச்சையை ஏற்படுத்தியுள்ளது.

இந்த சர்ச்சையோடு, 2001ம் ஆண்டின் கருணாநிதி கைது விவகாரம் மீண்டும் வெளிச்சத்துக்கு வந்துள்ளது.
நக்கீரன் முன்னாள் பத்திரிகையாளர் கோவி லெனின், யூட்யூபில் அளித்த பேட்டியில், அந்நேரத்தின் பின்புலத்தை விரிவாக விளக்கினார்.

அவரின் கூற்றுப்படி:“ஜெயலலிதா ஆட்சி அமைந்த உடனே, அனைத்து தரப்புகளுக்கும் எதிராக தாக்குதல்கள் நடந்தன. நக்கீரன் அலுவலகம் மீது கூட தாக்குதல் நடந்தது. அதே சமயம், ‘திமுக மோசமான அரிசியை சேமித்துள்ளது’ என்ற குற்றச்சாட்டில் கலைஞரை கைது செய்தனர். ஆனால், பொன்முடி அந்த கிடங்கில் நேரில் ஆய்வு செய்து, ‘அரிசி நல்லதுதான்’ என்று நிரூபித்தார். இதை ஒளிபரப்பிய கேமராமேன் கூட கைது செய்யப்பட்டார்.”இதனை கண்டித்து, பத்திரிகையாளர்கள் போராட்டம் நடத்தி வேப்பேரி காவல் நிலையத்தில் கைது செய்யப்பட்டனர்.

கோவி லெனின் மேலும் கூறியதாவது:“அந்த இரவு 1.30 மணிக்கு தகவல் வந்தது. சிபிசிஐடி அதிகாரிகள் கலைஞர் வீட்டின் கதவை உடைத்து உள்ளே நுழைந்தனர். அவரை இழுத்து, தள்ளி கைது செய்தார்கள். அந்த காட்சியை நேரில் பார்த்தோம். அப்போது மத்திய அமைச்சர் டிஆர் பாலு சண்டை போட்டார் — ‘கதவை திறங்கள்!’ என்று.”“கலைஞரை சிபிசிஐடி அலுவலகத்திலிருந்து நேராக மாவட்ட நீதிபதி அசோக் குமார் வீட்டிற்கு அழைத்துச் சென்றனர். அங்கே மாறனுக்கும் போலீசார் தாக்குதல் நடத்தியார்கள். நெஞ்சில் அடிபட்டார்.”

அந்த இரவில் கலைஞர் கைது செய்யப்பட்டபோது, நக்கீரன் இணை ஆசிரியரிடம் இருந்து ஒரு தாளை கேட்டுக் கொண்டு, தன் கையால் எழுதினார்:“அநீதி வீழும்… அறம் வெல்லும்.”இந்த வார்த்தைகள் பின்னர் தமிழக அரசியலின் அடையாளமாக மாறின.

அந்த சமயத்தில் ஸ்டாலின் பெங்களூரில் இருந்ததாக கோவி லெனின் கூறுகிறார்.“கலைஞர் கைது செய்யப்பட்டதை அறிந்த ஸ்டாலின், காரில் வந்து, காலை 11 மணிக்கே நீதிபதி அசோக் குமார் வீட்டை வந்தடைந்தார். பின்னர் அவரையும் ரிமாண்ட் செய்தார்கள்.”

வீட்டிலிருந்து வெளிவந்த ஸ்டாலின், பத்திரிகையாளர்களிடம் கூறியதாக கூறப்படுகிறது:“இது பொய்வழக்கு! நாங்கள் பார்க்காத ஜெயிலா!”

2001ல் நடந்த அந்த நள்ளிரவு கைது, தமிழக அரசியலில் ஒரு கருப்பு பக்கமாக நினைவுகூரப்படுகிறது.
இன்று, 24 ஆண்டுகள் கடந்தபோதும், அதற்கான விவாதம் மீண்டும் உயிர்ப்பெடுத்துள்ளது