2026 சட்டசபைத் தேர்தலை முன்னிட்டு திமுக கூட்டணியில் முக்கிய மாற்றம் ஒன்று ஏற்பட்டுள்ளது. நீண்ட நாளாக ஆட்சியிலும் அதிகாரத்திலும் பங்கேற்பு வேண்டும் என வலியுறுத்தி வந்த விசிக, திடீரென “இந்தத் தேர்தலில் அந்தக் கோரிக்கையை நிபந்தனையாக வைக்க மாட்டோம்” என்று அறிவித்துள்ளது. விசிக எம்பி ரவிக்குமார் முதலில் கூறிய இந்த கருத்தை, பிறகு கட்சி தலைவர் திருமாவளவன் உறுதி செய்ததும், திமுக கூட்டணிக்குள் அரசியல் கணக்குகள் மாற்றமடைந்துள்ளன.

இந்த அறிவிப்பு பலரையும் அதிர்ச்சியில் ஆழ்த்தியிருக்கிறது. குறிப்பாக, இதே கோரிக்கையை வலியுறுத்தி வந்த காங்கிரஸ் கட்சிக்கு இது நேரடி பின்னடைவு என அரசியல் வட்டாரங்கள் கருதுகின்றன.

விக்கிரவாண்டியில் நடந்த தவெகவின் மாநாட்டில் விஜய் “கூட்டணி கட்சிகளுக்கு ஆட்சிப் பங்கீடு” பற்றி கூறியதிலிருந்து தமிழக அரசியலில் இந்த விவாதம் தீவிரம் அடைந்தது. அதன் பின்னர், விசிக, காங்கிரஸ் மட்டுமன்றி, அதிமுக கூட்டணியில் இருந்த பல கட்சிகளும் இதே கோரிக்கையை முன்வைத்து மன அழுத்தம் ஏற்படுத்தின.

ஆனால் தேர்தல் நெருங்கும் நிலையில் விசிக திடீரென பக்கமாற்றியது திமுகவுக்கு பெரும் நிம்மதியைத் தந்துள்ளது.
திருமாவளவன் தெளிவாக,“ஆட்சிப் பங்கு கோரிக்கை எங்களுக்கு உள்ளது; ஆனால் 2026 தேர்தலில் அதை நிபந்தனையாக வைக்க மாட்டோம்”என்று சொல்லியதால், திமுக தலைவர் ஸ்டாலினுக்கு கூட்டணியை நிலைநாட்டும் வகையில் பெரிய அனுகூல சூழல் ஏற்பட்டுள்ளது.

இதே நேரத்தில், காங்கிரஸ் கடந்த பல மாதங்களாக “ஆட்சிப் பங்கு + அதிக தொகுதிகள்” என்ற கோரிக்கையை திமுக மீது அழுத்தமாக முன்வைத்து வந்தது. தவெகவுடன் கூட கூட்டணியைப் பற்றி சிந்திக்கலாம் என்ற சைகைகளையும் வெளிப்படையாக தெரிவித்தது.
ஆனால் பீகார் தேர்தல் முடிவுகளுக்குப் பின் காங்கிரஸ் அமைதி காத்திருந்தது. அதே சூழலில்தான் விசிக திடீரென பின்வாங்கியிருப்பது காங்கிரஸுக்கு பெரிய அதிர்ச்சியாகப் பார்க்கப்படுகிறது.

அரசியல் வட்டாரங்களின் கூற்று:விசிக குரலை வைத்தே காங்கிரஸை கட்டுப்படுத்த திமுக சைலண்ட் செக் போட்டிருக்கிறது.காங்கிரஸின் அழுத்தப் பேச்சு பலவீனமானது.திமுக கூட்டணியில் விசிக கொள்கைச் சாயலும், பாஜகவுக்கு எதிரான முக்கிய குரலும் எனப்படுகிறது.

நடைமுறையில், திமுக கூட்டணியின் உள்ளக சமநிலை விசிக-க்கு சாதகமாகவும், காங்கிரஸுக்கு சவாலாகவும் மாறி வருகிறது. 2026 தேர்தலில் விசிக கூடுதல் எம்எல்ஏக்களுக்கு இலக்கு வைப்பது தெளிவாகத் தெரிய வருகிறது.

விசிகவின் புதிய முடிவு –திமுக கூட்டணிக்கு பலம். காங்கிரஸின் பேச்சுவார்த்தை சக்திக்கு பின்னடைவு. கூட்டணிக்குள் அதிகாரப்பங்கு விவாதத்தில் பெரிய திருப்பம்

இது தொடர்ந்தும் தேர்தல் அரசியலில் எந்த மாற்றங்களை ஏற்படுத்தும் என்பதை அரசியல் வட்டாரங்கள் கவனித்து வருகின்றன.