தமிழகத்தில் அடுத்த சட்டமன்றத் தேர்தல் எப்போது நடைபெறும் என்ற எதிர்பார்ப்பு அரசியல் வட்டாரங்களிலும் பொதுமக்களிடமும் அதிகரித்து வருகிறது. தற்போது வெளியாகியுள்ள தகவல்களின் படி, தமிழகம் உட்பட ஐந்து மாநிலங்களுக்கான சட்டசபை தேர்தல் தேதிகளை இந்திய தேர்தல் ஆணையம் விரைவில் அறிவிக்கலாம் என கூறப்படுகிறது.

தமிழகத்தில் தற்போது ஆட்சி செய்து வரும் திமுக தலைமையிலான அரசின் பதவிக்காலம் வரும் மே 10ஆம் தேதி முடிவடைகிறது. இதனால் புதிய சட்டமன்றத்தை அமைக்க தேர்தல் நடத்துவது அவசியமாகியுள்ளது.

தமிழகத்துடன் சேர்த்து புதுச்சேரி, மேற்கு வங்கம், அசாம் மற்றும் கேரளா ஆகிய மாநிலங்களிலும் சட்டசபை தேர்தல் நடைபெற உள்ளது. இந்த ஐந்து மாநிலங்களில் மொத்தம் 824 சட்டசபை தொகுதிகள் உள்ளன. இதில் தமிழகத்தில் மட்டும் 234 தொகுதிகள் உள்ளன.

தேர்தலை நடத்துவதற்கான முன்னேற்பாடுகளை இந்திய தேர்தல் ஆணையம் தீவிரமாக மேற்கொண்டு வருகிறது. அதற்காக தேர்தல் ஆணைய அதிகாரிகள் ஒவ்வொரு மாநிலத்திற்கும் நேரில் சென்று ஆலோசனை நடத்தி வருகின்றனர்.

அந்த வகையில் கடந்த மாத இறுதியில் இந்திய தலைமை தேர்தல் ஆணையர் ஞானேஷ் குமார் சென்னை வந்து மாநில தேர்தல் அதிகாரிகளுடன் ஆலோசனை நடத்தினார். தமிழக தலைமை தேர்தல் அதிகாரி அர்ச்சனா பட்நாயக் உடன் நடைபெற்ற இந்த சந்திப்பில் வாக்குச்சாவடிகள், பாதுகாப்பு ஏற்பாடுகள், வாக்காளர் பட்டியல் உள்ளிட்ட பல்வேறு அம்சங்கள் குறித்து விரிவாக ஆய்வு செய்யப்பட்டதாக தகவல்கள் தெரிவிக்கின்றன.

மேலும் அங்கீகரிக்கப்பட்ட அரசியல் கட்சிகளின் தலைவர்களையும் தேர்தல் ஆணையர் சந்தித்து, தேர்தல் நடைமுறைகள் தொடர்பாக அவர்களின் கருத்துகளையும் கேட்டறிந்தார்.

இதற்கிடையில் பிரதமர் நரேந்திர மோடி திருச்சியில் நடைபெறவுள்ள தேசிய ஜனநாயக கூட்டணியின் பொதுக்கூட்டத்தில் பங்கேற்க உள்ளார். இந்த கூட்டத்தில் சில முக்கிய அரசியல் அறிவிப்புகள் வெளியாகலாம் என எதிர்பார்க்கப்படுகிறது.

பிரதமர் தனது பயணத்தை முடித்து டெல்லி திரும்பிய பிறகு, ஐந்து மாநிலங்களுக்கான தேர்தல் தேதிகளை தேர்தல் ஆணையம் அறிவிக்கலாம் என்றும் தகவல்கள் வெளியாகியுள்ளன. குறிப்பாக வரும் 15ஆம் தேதி தலைமை தேர்தல் ஆணையர் செய்தியாளர் சந்திப்பில் தேர்தல் அட்டவணை அறிவிக்கப்படலாம் என கூறப்படுகிறது.

தேர்தல் நடைபெற்று வாக்கு எண்ணிக்கை முடிந்ததும் புதிய அரசு அமைக்கப்படும். தற்போதைய திமுக அரசின் பதவிக்காலம் மே 10ஆம் தேதி முடிவடைவதால், அதற்கு முன்பாக புதிய சட்டமன்றத்தை அமைக்கும் வகையில் தேர்தல் ஆணையம் நடவடிக்கை எடுத்து வருகிறது.

இதனால் வரும் நாட்களில் தமிழக அரசியல் மேலும் சூடுபிடிக்கும் சூழல் உருவாகியுள்ளது. தேர்தல் தேதி அதிகாரப்பூர்வமாக அறிவிக்கப்பட்டவுடன் அனைத்து முக்கிய அரசியல் கட்சிகளும் தீவிர தேர்தல் பிரச்சாரத்தில் இறங்கும் என எதிர்பார்க்கப்படுகிறது.