ஆந்திர மாநிலத்தின் அன்னமய்யா மாவட்டம் புல்லம்பேட்டையில் மாம்பழம் ஏற்றிச் சென்ற டெம்போ லாரி கவிழ்ந்ததில் 9 பேர் உயிரிழந்தனர், மேலும் 11 பேர் காயமடைந்து மருத்துவமனையில் சிகிச்சை பெற்று வருகின்றனர்.

இந்த துயரமான விபத்து நேற்று (ஜூலை 13) இரவு 9:30 மணியளவில் நடைபெற்றது. ரெயில்வே கோடூரில் இருந்து மாம்பழங்களை ஏற்றி, ராஜம்பேட்டை நோக்கி சென்ற டெம்போ லாரி, சாலையில் இருந்த மணல் மீது சறுக்கி அதிவேகத்தில் கவிழ்ந்தது.

அப்போது லாரியில் மாம்பழ அறுவடைக்காக பணியமர்த்தப்பட்ட 20க்கும் மேற்பட்ட தொழிலாளர்கள் பயணித்துள்ளனர். இதில் 9 பேர் சம்பவ இடத்திலேயே அல்லது மருத்துவமனையில் உயிரிழந்தனர். காயமடைந்தவர்களில் நான்கு பேரின் நிலை மிகவும் கவலைக்கிடமாக உள்ளது என அதிகாரிகள் தெரிவித்துள்ளனர்.

முதற்கட்ட விசாரணையில், டிரைவரின் கவனக்குறைவுடன், சாலையின் மோசமான நிலையும் விபத்திற்கு காரணமாக இருக்கலாம் என கூறப்படுகிறது. மேலும், டிரைவர் விபத்துக்குப்பின் தப்பியோடியதாகவும், அவரை தேடும் பணியில் போலீசார் ஈடுபட்டுள்ளனர். சிசிடிவி காட்சிகள் மற்றும் சாட்சியங்கள் அடிப்படையில் விசாரணை நடைபெற்று வருகிறது.

இந்த கோர விபத்து அன்னமய்யா மாவட்டத்தில் பெரும் சோகத்தை ஏற்படுத்தியுள்ளது. உயிரிழந்தவர்களின் குடும்பங்களுக்கு ஆழ்ந்த இரங்கலை தெரிவித்துள்ள ஆந்திர மாநில அரசு, காயமடைந்தவர்களுக்கு சிறந்த மருத்துவ சிகிச்சை அளிக்க மாவட்ட நிர்வாகத்திற்கு உத்தரவிட்டுள்ளது.