தமிழ்நாட்டில் ஆண்டு வருமானம் ரூ.2.5 லட்சத்திற்குள் உள்ள குடும்பங்களைச் சேர்ந்த மணப்பெண்களுக்கு 8 கிராம் தங்க நாணயம் மற்றும் ஒரு பட்டுப் புடவை வழங்கும் 'அண்ணன் சீர்' திட்டத்தைச் செயல்படுத்த நிர்வாக அனுமதி அளித்து, முதற்கட்டமாக ரூ.812 கோடி நிதி ஒதுக்கீடு செய்து தமிழக அரசு அரசாணை வெளியிட்டுள்ளது.

திட்டத்தின் பயன்கள்: தமிழ்நாட்டைச் சேர்ந்த தகுதியுடைய மணப்பெண்களுக்கு 8 கிராம் (22 காரட்) தங்க நாணயமும், ஒரு பட்டுப் புடவையும் அரசின் சார்பில் 'அண்ணன் சீர்' பரிசாக வழங்கப்படும்.

வருமான வரம்பு தகுதி: குடும்ப ஆண்டு வருமானம் ரூ.2.5 லட்சத்திற்குள் இருக்கும் குடும்பங்களைச் சேர்ந்த பெண்களுக்கு இத்திட்டம் பொருந்தும்.

ரூ.812 கோடி நிதி ஒதுக்கீடு: 2026-27 ஆம் நிதியாண்டில் இத்திட்டத்தினை முதற்கட்டமாகச் செயல்படுத்துவதற்காக ரூ.812 கோடி நிதி ஒப்பளிப்பு செய்து சமூக நலன் மற்றும் மகளிர் உரிமைத்துறை அரசாணை வெளியிட்டுள்ளது.

விண்ணப்பிக்கும் முறை: அரசாணை வெளியிடப்படும் நாள் முதல் நடைபெறும் திருமணங்களுக்கு இத்திட்டம் பொருந்தும் என்றும், பிரத்யேக இணையதளம் வாயிலாக விண்ணப்பங்கள் பெறப்பட்டுத் திட்டம் செயல்படுத்தப்படும் என்றும் தெரிவிக்கப்பட்டுள்ளது.

கொள்முதல் நடைமுறை: தமிழ்நாடு திறந்தவெளி ஒப்பந்தப்புள்ளி சட்டத்தின் கீழ் தகுதிவாய்ந்த ஒப்பந்ததாரர் தேர்ந்தெடுக்கப்பட்டுத் தங்க நாணயம் மற்றும் பட்டுப் புடவை கொள்முதல் செய்யப்படும். தங்கத்தின் விலை IBJA (India Bullion and Jewellers Association) அமைப்பால் நிர்ணயிக்கப்படும் விலையின் அடிப்படையில் முடிவு செய்யப்படும்.