நெல்லை சந்திப்பு அருகே தலைவரின் நினைவு பீடம் அமைந்துள்ள பகுதியில் நள்ளிரவில் மர்ம நபர்கள் பெட்ரோல் குண்டு வீசிய சம்பவம் பெரும் பரபரப்பை ஏற்படுத்தியுள்ளது. சம்பவம் தொடர்பாக இருவரை காவலர்கள் கைது செய்து தீவிர விசாரணை நடத்தி வருகின்றனர். முன்னெச்சரிக்கை நடவடிக்கையாக அப்பகுதி முழுவதும் ஏராளமான காவலர்கள் பாதுகாப்புப் பணியில் ஈடுபடுத்தப்பட்டுள்ளனர்.நெல்லை சந்திப்பு ஸ்ரீபுரம் பகுதியில் இருந்து தச்சநல்லூர் செல்லும் சிவசக்தி சாலையில் உள்ள ஊருடையான் குடியிருப்பு பகுதியில் இரு சமூகங்களைச் சேர்ந்த மக்கள் வசித்து வருகின்றனர்.

அப்பகுதியில் முத்துராமலிங்க தேவரின் நினைவு பீடம் அமைந்துள்ளது.இந்த நிலையில், நேற்று நள்ளிரவில் நினைவு பீடம் அருகே வந்த இரு மர்ம நபர்கள், பெட்ரோல் நிரப்பப்பட்ட பாட்டிலில் திரியை பொருத்தி தீ வைத்து வீசியதாகத் தெரிகிறது. பாட்டில் தரையில் விழுந்து தீப்பற்றியதைப் பார்த்த அப்பகுதி மக்கள் உடனடியாக அங்கு திரண்டு வந்து தீயை அணைத்தனர். பின்னர் சம்பவம் குறித்து தச்சநல்லூர் காவல் நிலையத்திற்கு தகவல் அளிக்கப்பட்டது.

தகவல் கிடைத்ததும் தச்சநல்லூர் காவல் நிலைய ஆய்வாளர் விமலன் தலைமையிலான காவலர்கள் சம்பவ இடத்திற்கு விரைந்து சென்று ஆய்வு மேற்கொண்டனர். அங்கு உடைந்த கண்ணாடித் துண்டுகள் மற்றும் திரி உள்ளிட்ட பொருட்கள் சிதறிக் கிடந்ததை அவர்கள் கண்டறிந்தனர்.முதற்கட்ட விசாரணையில், மதுபான பாட்டிலில் பெட்ரோலை நிரப்பி, திரியை பொருத்தி தீப்பற்ற வைத்து நினைவு பீடம் அருகே வீசப்பட்டிருப்பது தெரியவந்தது.

இதையடுத்து சம்பவம் நடைபெற்ற பகுதியில் பொருத்தப்பட்டிருந்த கண்காணிப்பு கேமராக்களின் பதிவுகளை காவலர்கள் ஆய்வு செய்தனர்.கண்காணிப்பு கேமரா காட்சிகளை அடிப்படையாகக் கொண்டு விசாரணை மேற்கொண்டதில், அதே பகுதியைச் சேர்ந்த சீனிவாசராஜாவின் மகன் ஆகாஷ்ராமதுரை, வயது 22, மற்றும் சந்தனக்குமார், வயது 21, ஆகிய இருவருக்கும் சம்பவத்தில் தொடர்பு இருப்பது தெரியவந்ததாகத் தெரிவிக்கப்படுகிறது.

இதையடுத்து இருவரையும் காவலர்கள் கைது செய்து, பெட்ரோல் குண்டு வீசியதற்கான காரணம் மற்றும் சம்பவத்தின் பின்னணி குறித்து தீவிரமாக விசாரித்து வருகின்றனர்.இதற்கிடையே, நெல்லை மாநகர காவல் ஆணையர் பொறுப்பு மற்றும் நெல்லை சரக துணை காவல் தலைவர் திருநாவுக்கரசு ஆகியோர் சம்பவ இடத்திற்கு நேரில் சென்று ஆய்வு மேற்கொண்டனர். கைது செய்யப்பட்ட இருவரும் ஏற்கனவே ரவுடிகள் பட்டியலில் இடம்பெற்று காவல்துறையின் கண்காணிப்பில் இருந்தவர்கள் என்பதும் விசாரணையில் தெரியவந்ததாகத் தெரிவிக்கப்படுகிறது.

ஊருடையான் குடியிருப்பு பகுதியில் இரு சமூகத்தினரும் பயன்படுத்தி வரும் அரசுக்குச் சொந்தமான நிலம் ஒன்று உள்ளது. அந்த நிலத்தை இரு தரப்பினரும் பயன்படுத்திக் கொள்ளலாம் என்றும், தனிநபர்களுக்கு அதில் உரிமை இல்லை என்றும் தெரிவிக்கப்படுகிறது.இந்த நிலையில், அந்த இடத்தில் ஒரு தரப்பினர் கூரை அமைக்கும் பணியில் ஈடுபட முயன்றதாகவும், அதற்கு மற்றொரு தரப்பினர் எதிர்ப்பு தெரிவித்து தச்சநல்லூர் காவல் நிலையத்தில் புகார் அளித்ததாகவும் கூறப்படுகிறது.

இதனால் அந்தப் பணி தற்காலிகமாக நிறுத்தப்பட்டிருந்தது.இந்த விவகாரத்தில் ஏற்பட்ட மனக்கசப்பு மற்றும் ஆத்திரத்தின் காரணமாகவே நினைவு பீடம் அருகே பெட்ரோல் குண்டு வீசப்பட்டிருக்கலாம் என்ற கோணத்திலும் காவலர்கள் விசாரணை நடத்தி வருகின்றனர்.பெட்ரோல் குண்டு வீச்சு சம்பவத்தைத் தொடர்ந்து அப்பகுதியில் பதற்றமான சூழல் ஏற்பட்டது.

இதையடுத்து அசம்பாவிதங்கள் ஏதும் நடைபெறாமல் தடுக்கும் வகையில் ஏராளமான காவலர்கள் அங்கு குவிக்கப்பட்டு, முக்கிய இடங்களில் தீவிர கண்காணிப்பு மேற்கொள்ளப்பட்டு வருகிறது.சம்பவத்தின் பின்னணி, இதில் வேறு யாருக்கேனும் தொடர்பு உள்ளதா என்பது உள்ளிட்ட பல்வேறு கோணங்களில் காவலர்கள் தொடர்ந்து விசாரணை நடத்தி வருகின்றனர்.