உடல்நலக் குறைவால் கடந்த பத்து நாட்களுக்கு மேலாக சென்னை, ராமச்சந்திரா மருத்துவமனையில் சிகிச்சை பெற்று வந்த இயக்குனர் வி சேகர் (72), இன்று (நவம்பர் 14) மாலை காலமானார்.

திருவண்ணாமலை, நெய்வாநத்தம் கிராமத்தில் எஸ்.வெங்கடேசன் - பட்டம்மாள் தம்பதிக்கு 1953-ஆம் ஆண்டு பிப்ரவரி மாதம் 15-ஆம் தேதி பிறந்தவர். உறவினர் கண்ணப்பன் உதவியால் ஏவி.எம்.ஸ்டுடியோவில் கருப்பு வெள்ளை 16 எம்.எம். லேப்பில் உதவியாளராக 19 வயதில் வேலைக்கு சேர்ந்தார். பின்னர் மாநகராட்சி சுகாதார துறையில் 15 ஆண்டுகள் பணியாற்றியவர் அப்படியே மாலை நேரக் கல்லூரியில் படித்து எம்.ஏ. படிப்பு முடித்தார்.

கே.பாக்யராஜின் உதவியாளர் கோவிந்தராஜ் இயக்கிய 'கண்ண தொறக்கனும்சாமி' படத்தில் உதவி இயக்குனராக பணிபுரிந்துள்ளார். பிறகு கே.பாக்யராஜின் உதவியாளராக இரண்டு ஆண்டுகள் கதை இலாகாவில் பணியாற்றினார். இவர் இயக்கிய முதல் படம் 'நீங்களும் ஹீரோதான்'. தொடர்ந்து 'நான் புடிச்ச மாப்பிள்ளை' படம் அவருக்கு பெரிய வெற்றியை தந்தது.

'பொண்டாட்டி சொன்னா கேட்டுக்கணும்', 'ஒண்ணா இருக்க கத்துக்கணும்', 'பொறந்த வீடா புகுந்த வீடா', 'பார்வதி என்னை பாரடி', 'வரவு எட்டணா செலவு பத்தணா', 'நான் பெத்த மகனே', 'காலம் மாறிப் போச்சு', 'பொங்கலோ பொங்கல்', 'எல்லாமே என் பொண்டாட்டிதான்', 'விரலுக்கு ஏத்த வீக்கம்', 'கூடி வாழ்ந்தால் கோடி நன்மை', 'வீட்டோட மாப்பிள்ளை', 'நம்ம வீட்டு கல்யாணம்', 'ஆளுக்கொரு ஆசை' போன்ற தமிழ்ப் படங்களை இயக்கியவர்.

அத்தோடு, கன்னடத்தில் ரமேஷ் அரவிந்த், மீனா நடிப்பில் 'ஹெந்தீர் தர்பார்' என்கிற படத்தையும் இயக்கியுள்ளார். குறிப்பாக, குடும்ப படங்களில் இயக்குவதில் திறமைசாலியான இவரின் படங்களில் காமெடி காட்சிகளும் பேசப்படும் படங்களாக இருந்தது.

இயக்குனராக மட்டுமல்லாது தனது திருவள்ளுவர் கலைக்கூடம் பட நிறுவனம் மூலம் ஏய் உள்ளிட்ட பல படங்களை தயாரித்துள்ளார். சின்னத்திரையிலும் டிவி தொடர் எடுத்துள்ளார். அத்துடன், ஓரிரு படங்களில் நடித்துள்ளார்.

அதன் பின்னர் சிலை கடத்தல் வழக்கு உள்ளிட்ட பிரச்சினைகளில் சிக்க, சினிமாவில் இருந்து ஒதுங்கினார். 10 நாட்களுக்கு முன்பு நெஞ்சுவலி ஏற்பட, மயங்கி நிலையில் சென்னையில் உள்ள தனியார் மருத்துவமனையில் அனுமதிக்கப்பட்டார். தொடர்ந்து மருத்துவமனையில் சிகிச்சை பெற்றவர் இன்று காலமாகியுள்ளார்.

இயக்குநர் வி சேகருக்கு தமிழ் செல்வி என்ற மனைவியும், மலர்க்கொடி என்றமகளும், காரல் மார்க்ஸ் என்கிற மகனும் உள்ளனர். இவரின் உடல் நாளை கோடம்பாக்கத்தில் உள்ள அவரது இல்லத்திற்கு கொண்டு வரப்படுகிறது. அத்துடன், நாளை இறுதிச்சடங்கு நடக்கவுள்ளது.