தமிழக அரசு, தென் மண்டல கவுன்சிலில் தமிழகத்தை பிரதிநிதித்துவப்படுத்தும் உறுப்பினர்கள் மற்றும் ஆலோசகர்களை நியமித்து அரசாணை வெளியிட்டுள்ளது. முதலமைச்சர் சி. ஜோசப் விஜய் தலைமையிலான இந்தக் குழுவில் அமைச்சர்கள் சி.டி.ஆர். நிர்மல் குமார் மற்றும் ராஜ்மோகன் ஆகியோருக்கு முக்கிய பொறுப்பு வழங்கப்பட்டுள்ளது.

தமிழகத்தில் புதிய அரசு பொறுப்பேற்றதைத் தொடர்ந்து, பல்வேறு வாரியங்கள், ஆணையங்கள் மற்றும் மாநில பிரதிநிதித்துவ அமைப்புகளுக்கு புதிய நியமனங்கள் செய்யப்பட்டு வருகின்றன. அந்த வரிசையில், தென் மண்டல கவுன்சிலில் தமிழகத்தின் பிரதிநிதிகளாக இந்த நியமனங்கள் அறிவிக்கப்பட்டுள்ளன.

தென் மண்டல கவுன்சில் என்பது மத்திய அரசு அவ்வப்போது கூட்டும் முக்கிய அமைப்பாகும். இதில் தமிழ்நாடு, கேரளா, கர்நாடகா, ஆந்திரப் பிரதேசம், தெலங்கானா ஆகிய மாநிலங்கள் மற்றும் புதுச்சேரி, அந்தமான் மற்றும் நிக்கோபார் தீவுகள் யூனியன் பிரதேசங்களின் முதலமைச்சர்கள், அமைச்சர்கள் மற்றும் உயர் அதிகாரிகள் பங்கேற்பார்கள்.

மாநிலங்களுக்கு இடையேயான நதிநீர் பகிர்வு, எல்லைப் பிரச்சினைகள், போக்குவரத்து, உள்கட்டமைப்பு மேம்பாடு, உள்நாட்டுப் பாதுகாப்பு, பொருளாதார வளர்ச்சி உள்ளிட்ட பிராந்திய முக்கியத்துவம் வாய்ந்த விவகாரங்கள் குறித்து ஆலோசித்து, ஒருங்கிணைந்த தீர்வுகளை உருவாக்குவது இந்தக் கவுன்சிலின் முக்கிய நோக்கமாகும்.

தற்போது வெளியிடப்பட்ட அரசாணையின்படி, முதலமைச்சர் சி. ஜோசப் விஜய்யுடன் இணைந்து, எரிசக்தி வளங்கள் மற்றும் சட்டத்துறை அமைச்சர் சி.டி.ஆர். நிர்மல் குமார் மற்றும் பள்ளிக்கல்வி, தமிழ் வளர்ச்சி, தகவல் மற்றும் செய்தி விளம்பரத்துறை அமைச்சர் ராஜ்மோகன் ஆகியோர் தென் மண்டல கவுன்சிலில் தமிழகத்தின் பிரதிநிதிகளாக செயல்பட உள்ளனர்.

மேலும், தமிழ்நாடு அரசின் தலைமைச் செயலாளர் எம். சாய்குமாருடன், உள்துறை, மதுவிலக்கு மற்றும் கலால் துறையின் கூடுதல் தலைமைச் செயலாளர் கே. மணிவாசனும் தென் மண்டல கவுன்சிலின் ஆலோசகராக நியமிக்கப்பட்டுள்ளார்.

2021-ஆம் ஆண்டு வெளியிடப்பட்ட முந்தைய நியமனங்களுக்கு பதிலாக, 2026 ஜூலை 17-ஆம் தேதியிட்ட அரசாணை மூலம் இந்த புதிய நியமனங்கள் அமலுக்கு வந்துள்ளன.

முந்தைய ஆட்சிக்காலத்தில், முன்னாள் முதலமைச்சர் மு.க. ஸ்டாலின், முன்னாள் தொழில்துறை அமைச்சர் டி.ஆர்.பி. ராஜா மற்றும் முன்னாள் இந்து சமய அறநிலையத்துறை அமைச்சர் பி.கே. சேகர்பாபு ஆகியோர் தமிழகத்தின் பிரதிநிதிகளாக தென் மண்டல கவுன்சிலில் இடம்பெற்றிருந்தது குறிப்பிடத்தக்கது.