தமிழக முதலமைச்சர் மு.க.ஸ்டாலின் கடந்த 9 நாட்களாக ஜெர்மனி, இங்கிலாந்து ஆகிய நாடுகளில் அரசு முறை பயணம் மேற்கொண்டிருந்தார். அங்கு முதலீட்டாளர்களை சந்தித்து, தமிழ்நாட்டில் தொழில் விரிவாக்கம் மற்றும் வேலைவாய்ப்பு உருவாக்கம் குறித்த பல புரிந்துணர்வு ஒப்பந்தங்களை கையெழுத்திட்டார்.

இந்த பயணத்தை முடித்து, இன்று சென்னை வந்தடைந்த முதலமைச்சர் ஸ்டாலினுக்கு, விமான நிலையத்தில் அமைச்சர்கள், திமுக நிர்வாகிகள், தொண்டர்கள் என ஏராளமானோர் உற்சாக வரவேற்பு அளித்தனர்.

இதையடுத்து செய்தியாளர்களை சந்தித்த முதலமைச்சர் ஸ்டாலின் பேசியதாவது:முதலீட்டு வெற்றிப் பயணம்: “ஜெர்மனி, இங்கிலாந்து நாடுகளில் முதலீடுகளை ஈர்த்து மன நிறைவுடன் திரும்பி இருக்கிறேன். இது வரை நான் மேற்கொண்ட பயணங்களில் மிக முக்கியமானதாக இந்த பயணம் அமைந்துள்ளது. தமிழ்நாட்டின் மீது நம்பிக்கை வைத்து பல்வேறு நிறுவனங்கள் முதலீடுகளை செய்துள்ளன. வெற்றிப்பயணத்தால் பெரும் திருப்தி கிடைத்துள்ளது.”

வெளிநாட்டு நிறுவனங்கள் ஆர்வம்: “பல வெளிநாட்டு நிறுவனங்கள் தமிழ்நாட்டில் தொழில் முதலீடு செய்யவே விரும்புகின்றன. தமிழ்நாடு ஒரு முதலீட்டு நட்பு மாநிலமாக இருப்பதை இப்பயணம் உறுதிப்படுத்தியுள்ளது.”

அமைச்சரின் பங்கு: “தொழிற்துறை அமைச்சர் டி.ஆர்.பி. ராஜா துடிப்பானவர் என்பதை நிரூபித்துள்ளார். இந்த பயணத்தின் வெற்றிக்கு அவரின் பங்களிப்பு குறிப்பிடத்தக்கது.”

விமர்சனங்களுக்கு பதில்: “எனது வெற்றிப் பயணத்தை பொறுக்க முடியாமல் சிலர் புலம்பி வருகின்றனர். ஆனால், முதலீடுகள் தமிழ்நாட்டிற்கு வந்து, வேலைவாய்ப்புகள் உருவாகுவது தான் எங்களுக்கு முக்கியம்.”

முதலமைச்சர் மு.க.ஸ்டாலின் கடந்த மாதம் 30-ஆம் தேதி வெளிநாடு புறப்பட்டு சென்றார். அங்கு நடைபெற்ற பேச்சுவார்த்தைகளில், தமிழ்நாட்டிற்காக 15,000 கோடிக்கும் அதிகமான முதலீடுகள் ஈர்க்கப்பட்டுள்ளன. இதன் மூலம் பல ஆயிரம் பேருக்கு வேலைவாய்ப்புகள் உருவாகும் என எதிர்பார்க்கப்படுகிறது.