தமிழக வாழ்வுரிமைக் கட்சி வெளியிட்டுள்ள அறிக்கையில், மின்கட்டண உயர்வு தொடர்பாக மாநில அரசுக்கு கடுமையான எச்சரிக்கையும் கோரிக்கையும் முன்வைக்கப்பட்டுள்ளது.அந்த அறிக்கையில் தெரிவிக்கப்பட்டிருப்பதாவது,"தமிழ்நாடு அரசு மின்கட்டணத்தை உயர்த்தும் திட்டத்தை உடனடியாக திரும்பப் பெற்று, தற்போதைய கட்டண முறையையே தொடர வேண்டும். மின்வாரியத்தின் நிதிநிலையை சீர்படுத்துவதற்கான வழி பொதுமக்கள் மீது கூடுதல் சுமையை திணிப்பது அல்ல.

மாறாக, நிர்வாக சீர்திருத்தங்கள், வீண்செலவுகளை கட்டுப்படுத்துதல் மற்றும் வருவாய் இழப்புகளை குறைக்கும் நடவடிக்கைகள் மூலம் மின்வாரியத்தை வலுப்படுத்த வேண்டும்.மக்களின் வாழ்வாதாரத்தை பாதிக்கும் வகையில் மின்கட்டண உயர்வு அமல்படுத்தப்பட்டால், தமிழக வாழ்வுரிமைக் கட்சி மக்களுடன் களமிறங்கி தீவிர ஜனநாயகப் போராட்டங்களை முன்னெடுக்கும்.கடந்த 2017-ஆம் ஆண்டு மத்திய அரசின் உதய் மின் திட்டத்தில் தமிழ்நாடு இணைந்தது.

அந்த ஒப்பந்தத்தின் அடிப்படையில், 2027-ஆம் ஆண்டு வரை ஒவ்வொரு ஆண்டும் ஜூலை மாதத்தில் மின்கட்டண திருத்தம் மேற்கொள்ளப்பட வேண்டும் என்ற நிபந்தனை வகுக்கப்பட்டுள்ளது.இந்த திட்டத்தின் கீழ் நிதியுதவிகளை பெறுவதற்காக ஆண்டுதோறும் மின்கட்டணத்தை மாற்றியமைக்க தமிழ்நாடு மின்சார ஒழுங்குமுறை ஆணையம் அனுமதி வழங்கியுள்ளதாக தெரிவிக்கப்படுகின்றது.

நடைமுறையில் உள்ள விதிகளின்படி, 6 சதவீதம் அல்லது ஏப்ரல் மாத பணவீக்க விகிதம் ஆகிய இரண்டில் எது குறைவோ அந்த அளவுக்கு மட்டுமே கட்டண உயர்வு இருக்க வேண்டும்.எனினும், கடந்த தி.மு.க. ஆட்சிக்காலத்தில் வீட்டு மின் இணைப்புகளுக்கான கூடுதல் கட்டணச் சுமையை அரசே ஏற்றுக்கொள்ளும் என அறிவிக்கப்பட்டது.

அதேவேளையில், 2022-ஆம் ஆண்டில் மின்கட்டணம் 52 சதவீதம் வரை உயர்த்தப்பட்டதாகவும் குறிப்பிடப்பட்டுள்ளது.அடுத்தடுத்த ஆண்டுகளிலும் ஜூலை 1-ஆம் தேதி முதல் பணவீக்க விகிதம் அல்லது 6 சதவீதம் என்ற வரம்பிற்குள் கட்டண திருத்தம் மேற்கொள்ளப்படும் என அறிவிக்கப்பட்டிருந்தது.

இந்த ஆண்டு 3.86 சதவீதம் அளவுக்கு மின்கட்டணம் உயரக்கூடும் என்ற தகவல்கள் வெளியாகி வரும் நிலையில், இதுகுறித்து இறுதி முடிவை முதல்-அமைச்சர் எடுப்பார் என்று மின்துறை அமைச்சர் நிர்மல் குமார் தெரிவித்துள்ளதாக கூறப்படுகிறது.தொழிற்சாலைகள் மற்றும் வணிக நிறுவனங்களுக்கான மின்கட்டணத்தை மட்டும் உயர்த்தினாலும் அதன் தாக்கம் நேரடியாக மக்களையே சென்றடையும்.

ஏற்கனவே அதிகரித்த மின்சாரச் செலவினால் சிறு, குறு மற்றும் நடுத்தர தொழில் நிறுவனங்கள் கடுமையான நெருக்கடியை சந்தித்து வருகின்றன.கடந்த சில ஆண்டுகளில் தொழில்துறை மின்கட்டணம் கணிசமாக உயர்ந்ததால், மாநிலம் முழுவதும் 60 ஆயிரத்திற்கும் மேற்பட்ட சிறு மற்றும் நடுத்தர நிறுவனங்கள் செயல்பாட்டை நிறுத்தியுள்ளதாக தெரிவிக்கப்படுகின்றது.

மீண்டும் கட்டண உயர்வு அமல்படுத்தப்பட்டால் மீதமுள்ள தொழில் நிறுவனங்களும் பெரும் நெருக்கடிக்குள் தள்ளப்படும். அதன் விளைவாக வேலைவாய்ப்பு குறைவு, தொழிலாளர் பாதிப்பு மற்றும் பொருளாதார மந்தநிலை மேலும் தீவிரமடையும் அபாயம் உள்ளது.தமிழக வெற்றிக் கழகம் தனது தேர்தல் அறிக்கையில் மாதந்தோறும் மின்சார கணக்கீட்டு முறையை அறிமுகப்படுத்துவதாகவும், அடுக்குமாடி குடியிருப்புகள் மற்றும் சிறு, குறு தொழில்களுக்கான மின்கட்டணத்தை குறைப்பதாகவும் உறுதியளித்திருந்தது.

இந்நிலையில், முந்தைய அரசின் முடிவுகளை காரணமாக சுட்டிக்காட்டி மீண்டும் கட்டண உயர்வை அமல்படுத்த முயல்வது தேர்தல் வாக்குறுதிகளின் நோக்கத்திற்கே முரணானதாக அமைந்துள்ளது.தமிழ்நாட்டில் ஏற்கனவே விலைவாசி உயர்வு, வேலைவாய்ப்பின்மை, வாழ்வாதார நெருக்கடி உள்ளிட்ட பல்வேறு சவால்களால் ஏழை மற்றும் நடுத்தர மக்கள் கடுமையாக பாதிக்கப்பட்டுள்ளனர்.

இதுபோன்ற சூழ்நிலையில் மின்கட்டண உயர்வு அமல்படுத்தப்படுவது குடும்பச் செலவுகளை மேலும் அதிகரிப்பதோடு, சிறு வணிகர்கள், தொழில்முனைவோர், தொழிலாளர்கள் மற்றும் பொதுமக்கள் அனைவரின் பொருளாதார நிலைக்கும் பாதிப்பை ஏற்படுத்தும்.மக்கள் நலனே அரசின் முதன்மை நோக்கமாக இருக்க வேண்டும்.

எனவே மின்கட்டண உயர்வு குறித்த முடிவை தமிழக அரசு உடனடியாக கைவிட வேண்டும்.அவ்வாறு செய்யத் தவறினால், பொதுமக்களின் ஆதரவுடன் மாநிலம் முழுவதும் வலுவான போராட்டங்களை முன்னெடுக்க தமிழக வாழ்வுரிமைக் கட்சி தயங்காது என அறிக்கையில் எச்சரிக்கை விடுக்கப்பட்டுள்ளது.