மருத்துவக் கனவுகளைச் சுமந்து நிற்கும் 26 லட்சத்திற்கும் அதிகமான மாணவர்களுக்கான மிக முக்கியமான அறிவிப்பு இன்று வெளியாகியுள்ளது. தேசியத் தேர்வுகள் முகமை (NTA), இளநிலை நீட் (NEET-UG) 2026 தேர்விற்கான ஹால் டிக்கெட்டுகளைத் தனது அதிகாரப்பூர்வ இணையதளத்தில் திங்கள்கிழமை (ஏப்ரல் 27) வெளியிட்டுள்ளது.

இந்திய வரலாற்றிலேயே இல்லாத வகையில் இந்த ஆண்டு நீட் தேர்விற்கு 26 லட்சத்திற்கும் மேற்பட்ட மாணவர்கள் விண்ணப்பித்துள்ளனர். இது மருத்துவ இடங்களுக்கான போட்டி எந்த அளவிற்கு உச்சத்தில் உள்ளது என்பதைக் காட்டுகிறது. வரும் மே 3-ஆம் தேதி (ஞாயிற்றுக்கிழமை) பிற்பகல் 2:00 மணி முதல் மாலை 5:00 மணி வரை இந்தத் தேர்வு நாடு முழுவதும் நடைபெறவுள்ளது.

எந்தெந்த படிப்புகளுக்கு?

நீட் தேர்வு என்பது வெறும் எம்பிபிஎஸ் படிப்பிற்கு மட்டும் இன்றி, மருத்துவத் துறையின் பல்வேறு பிரிவுகளுக்கான நுழைவுச் சீட்டாக உள்ளது:

எம்பிபிஎஸ் (MBBS) மற்றும் பிடிஎஸ் (BDS).

ஆயுஷ் (AYUSH) படிப்புகள்: சித்தா, ஆயுர்வேதா, யுனானி மற்றும் ஹோமியோபதி.

கால்நடை மருத்துவம்: அகில இந்திய ஒதுக்கீட்டு இடங்கள்.

ராணுவக் கல்லூரிகள்: பிஎஸ்சி நர்சிங் மாணவர் சேர்க்கை.

தேர்வு மையங்கள் மற்றும் பதிவிறக்கம்:

நாடு முழுவதும் 552 நகரங்களிலும், துபாய், சிங்கப்பூர், ரியாத் உள்ளிட்ட 16 வெளிநாட்டு நகரங்களிலும் பிரம்மாண்டமாகத் தேர்வு மையங்கள் அமைக்கப்பட்டுள்ளன. தமிழகத்தைப் பொறுத்தவரை சென்னை, மதுரை, கோவை உட்பட 30 முக்கிய நகரங்களில் தேர்வுகள் நடைபெறவுள்ளன.

விண்ணப்பதாரர்கள் neet.nta.nic.in என்ற இணையதளத்தில் தங்களது விண்ணப்ப எண் மற்றும் பிறந்த தேதியைப் பதிவிட்டு நுழைவுச் சீட்டைப் பதிவிறக்கம் செய்து கொள்ளலாம். கடைசி நேர இணையத் தடங்கல்களைத் தவிர்க்க மாணவர்கள் இப்போதே ஹால் டிக்கெட்டைப் பதிவிறக்கம் செய்து, அதில் குறிப்பிட்டுள்ள தேர்வு மைய முகவரி மற்றும் விதிமுறைகளை நன்கு படித்துக் கொள்வது அவசியமாகும்.