கடலூர் நெல்லிக்குப்பம் பகுதியைச் சேர்ந்த தொழிலாளி விக்னேஷ் மற்றும் அவரது மனைவி சரிதா ஆகியோரின் 2 வயது மகன் விதுன், எதிர்பாராத விபத்தில் உயிரிழந்த சம்பவம் அப்பகுதியையே சோகத்தில் ஆழ்த்தியுள்ளது.நேற்று மதிய வேளையில், வீட்டின் முன்புறத்தில் அமர வைத்து தனது மகன் விதுனுக்கு சரிதா உணவு ஊட்டிக் கொண்டிருந்ததாக தெரிவிக்கப்படுகிறது.

அப்போது குடிநீர் எடுத்து வருவதற்காக சில நிமிடங்கள் வீட்டிற்குள் சென்றுள்ளார்.அந்தச் சிறிய இடைவெளியில், விளையாட்டாக நடந்து சென்ற விதுன் அருகில் அமைந்திருந்த ரெயில்வே தண்டவாளப் பகுதியை நோக்கிச் சென்றதாக தெரிவிக்கப்படுகிறது.

குழந்தை தண்டவாளத்தின் அருகே சென்றதை யாரும் கவனிக்காத நிலையில், எதிர்பாராத சோகம் அரங்கேறியது.அச்சமயம் திருச்சியில் இருந்து சென்னை நோக்கி வேகமாகச் சென்று கொண்டிருந்த சோழன் விரைவு ரெயில் அந்த வழியாக வந்தது.

தண்டவாளத்தில் இருந்த சிறுவன் மீது ரெயில் மோதியதில், குழந்தை பலத்த தாக்குதலுக்கு உள்ளாகி தூக்கி வீசப்பட்டதாக தெரிவிக்கப்படுகிறது.

இந்த கோர விபத்தில் 2 வயது சிறுவன் விதுன் சம்பவ இடத்திலேயே உயிரிழந்தான். தகவலறிந்து அங்கு ஓடிவந்த தாய் சரிதா, தனது செல்ல மகனின் உயிரற்ற உடலைக் கண்டு கதறி அழுத காட்சி காண்போரின் இதயத்தை உருக்கியது.

ஒரு கண நேர அலட்சியம் குடும்பத்தின் பேரிழப்பாக மாறிய இந்த சம்பவம், அப்பகுதி மக்களிடையே பெரும் சோகத்தையும் வேதனையையும் ஏற்படுத்தியுள்ளது. குழந்தையை பறிகொடுத்த தாயின் கதறல், அங்கிருந்தவர்களின் கண்களிலும் கண்ணீரை வரவழைத்ததாக தெரிவிக்கப்படுகிறது.