தமிழ்நாடு சட்டப்பேரவையில் நெடுஞ்சாலைத் துறை மானியக் கோரிக்கை மீதான விவாதத்திற்குப் பதிலளித்துப் பேசிய அமைச்சர் ஆதவ் அர்ஜூனா, அதிவேக விரைவுச் சாலைகள், கடல்வழி உள்கட்டமைப்பு மற்றும் சாலைப் பாதுகாப்பு தொடர்பான பல்வேறு முக்கிய அறிவிப்புகளை வெளியிட்டார்.

முக்கிய விரைவுச் சாலைகள் & உயர்மட்டப் பாலங்கள்
தொழில் தட விரைவுச் சாலை: சென்னை - கோவை - தூத்துக்குடியை இணைக்கும் புதிய அதிவேகத் தொழில் தட விரைவுச் சாலை (Industrial Corridor Expressway) உருவாக்கப்படும்.

சென்னை-புதுச்சேரி கடல்வழிச் சாலை: சென்னை - மாமல்லபுரம் - புதுச்சேரியை இணைக்கும் கடல்வழி உயர்மட்டச் சாலைத் தொடர், மும்பை - நவி மும்பை கடல் இணைப்புச் சாலையைப் போலக் கட்டம் கட்டமாக அமைக்கப்படும்.

சென்னையில் உயர்மட்டச் சாலை: சென்னையின் கலங்கரை விளக்கம் முதல் அடையாறு திரு.வி.க. பாலம் வரை புதிய உயர்மட்டச் சாலை அமைக்கப்படும்.

சென்னையில் முக்கோண வழித்தடம்: சென்னையில் போக்குவரத்து நெரிசலைக் குறைக்க ரூ.400 கோடி மதிப்பில் முக்கோண வழித்தடச் சாலை அமைக்கப்படும்.

வடசென்னை மேம்பாலம்: வடசென்னையில் பெருகி வரும் போக்குவரத்துத் தேவைகளைக் கருத்தில் கொண்டு, வியாசர்பாடியில் உள்ள ரயில்வே மேம்பாலம் நீட்டிக்கப்படும்.

தேசிய நெடுஞ்சாலைத் திட்டங்கள் & சாலை மேம்பாடு
தேசிய நெடுஞ்சாலைகள் விரைவுமயமாக்கல்: சென்னை - கன்னியாகுமரி 8 வழிச்சாலை, சென்னை நுழைவு வழித்தடச் சந்திப்புகள் மேம்பாடு, திருச்சி - கரூர் தேசிய நெடுஞ்சாலை விரிவாக்கம் மற்றும் கிளாம்பாக்கம் - செங்கல்பட்டு உயர்மட்டச் சாலை உள்ளிட்ட திட்டங்கள் விரைவுபடுத்தப்படும்.

வெற்றி எம்.எல்.ஏ சாலை மேம்பாட்டுத் திட்டம்: சட்டப்பேரவை உறுப்பினர்களின் தொகுதிகளுக்கான சிறப்புச் சாலை மேம்பாட்டுத் திட்டம் செயல்படுத்தப்படும்.

இருவழிப் பாதைகளாக மாற்றம்: மாநிலம் முழுவதும் உள்ள 45,000 கிலோமீட்டர் நீளமுள்ள சாலைகள் இருவழிப் பாதைகளாகத் தரம் உயர்த்தப்படும்.

சீரான சாலைகள் திட்டம்: 'நம்ம சாலை' செயலியின் மேம்பாட்டை உள்ளடக்கிய சீரான சாலைகள் திட்டம் ரூ.250 கோடி மதிப்பில் நடைமுறைப்படுத்தப்படும்.

கடல்வழிப் பயணிகள் படகுப் போக்குவரத்து
சென்னை - புதுச்சேரி படகுச் சேவை: சென்னை - மாமல்லபுரம் - புதுச்சேரி இடையே கடல்வழிப் பயணிகள் படகுப் போக்குவரத்துச் சேவை தொடங்க நடவடிக்கை எடுக்கப்படும்.

பாம்பன் டூ அக்னி தீர்த்தம்: பாம்பன் முதல் அக்னி தீர்த்தம் வரை உள்நாட்டுப் பயணிகள் படகுப் போக்குவரத்துச் சேவை தொடங்கப்படும்.

நாகை - காங்கேசன்துறை: நாகப்பட்டினம் - இலங்கை காங்கேசன்துறை இடையிலான சர்வதேசப் படகுப் போக்குவரத்துச் சேவை மேலும் விரிவுபடுத்தப்படும்.

சாலைப் பாதுகாப்பு & விதிக் கட்டுப்பாடுகள்
கடுமையாகும் சாலை விதிகள்: சாலை விபத்துகளை முற்றிலுமாகத் தடுக்கும் நோக்கில், அடுத்த ஆண்டு முதல் வீதிச் சட்டங்கள் மற்றும் விதிகள் மேலும் கடுமையாக்கப்படும்.

ரூ.500 கோடியில் கண்காணிப்புக் குழு: சாலைப் பாதுகாப்பை உறுதிசெய்யவும் விபத்துகளைக் கண்காணிக்கவும் ரூ.500 கோடி நிதியில் சாலைப் பாதுகாப்புக் கண்காணிப்புக் குழு அமைக்கப்படும்.

பேட்ச் ஒர்க் ஊழல் தடுப்பு: நெடுஞ்சாலைகளில் பேட்ச் ஒர்க் (Patchwork) பணிகளுக்கு மட்டும் அதிகளவில் செலவு செய்யப்படுவதாகவும், அதில் ஊழல் நிகழ்ந்துள்ளதாகவும் சுட்டிக்காட்டிய அமைச்சர், அதை முறைப்படுத்த நடவடிக்கை எடுக்கப்படும் எனத் தெரிவித்தார்.