திருவள்ளூர் என்.ஜி.ஓ. காலனி பகுதியில் சில ஆண்டுகளுக்கு முன்பு செயல்பட்டு வந்த தனியார் முதலீட்டு நிறுவனம் தொடர்பான பல கோடி ரூபாய் மோசடி விவகாரம் பரபரப்பை ஏற்படுத்தியுள்ளது. இந்த நிறுவனத்தை வில்லிவாக்கத்தைச் சேர்ந்த சகோதரர்களான கண்ணன் மற்றும் கமலதாஸ் ஆகியோர் நிர்வகித்து வந்தனர்.

திருவள்ளூர், காக்களூர், புட்லூர், தண்ணீர்குளம், பெரியகுப்பம், மணவாளநகர் உள்ளிட்ட பல்வேறு பகுதிகளைச் சேர்ந்த பொதுமக்கள் முதலீடு செய்வதற்கும் கடன் பெறுவதற்கும் இந்த நிறுவனத்தை நாடி வந்தனர். குறிப்பாக, முதலீடு செய்யும் தொகைக்கு இரட்டிப்பு வருமானம் வழங்கப்படும் என கவர்ச்சிகரமான வாக்குறுதிகள் அளிக்கப்பட்டதாக தெரிவிக்கப்படுகிறது.

ஆரம்ப கட்டத்தில் முதலீட்டாளர்களுக்கு உறுதியளிக்கப்பட்டபடி அதிகளவு வருமானம் வழங்கப்பட்டதால், நிறுவனத்தின் மீது பொதுமக்களுக்கு நம்பிக்கை அதிகரித்தது. இதையடுத்து, புதிய முதலீட்டாளர்களை சேர்ப்பதற்காக ஏராளமான முகவர்களும் பணியில் ஈடுபடுத்தப்பட்டனர்.

இந்த நம்பிக்கையின் அடிப்படையில், 200-க்கும் மேற்பட்டோர் தங்களது சேமிப்பு மற்றும் சொத்து விற்பனை மூலம் பெற்ற பணத்தை முதலீடு செய்ததாகவும், மொத்த முதலீட்டு தொகை ரூ.28 கோடி முதல் ரூ.30 கோடி வரை உயர்ந்ததாகவும் தெரிவிக்கப்படுகிறது.

ஆனால், காலக்கெடு முடிந்த பின்னரும் முதலீட்டுத் தொகையோ, வாக்குறுதியளிக்கப்பட்ட வருமானமோ வழங்கப்படாததால் முதலீட்டாளர்கள் அதிர்ச்சியடைந்தனர்.

பின்னர் நிறுவனம் திட்டமிட்டு பண மோசடியில் ஈடுபட்டது தெரியவந்ததைத் தொடர்ந்து, பாதிக்கப்பட்டவர்கள் திருவள்ளூர் பொருளாதார குற்றப்பிரிவு காவலர்களிடம் புகார் அளித்தனர்.

புகாரின் அடிப்படையில் வழக்குப்பதிவு செய்த காவலர்கள் மேற்கொண்ட விசாரணையில், திருச்சி, மதுரை உத்தங்குடி, சிவகங்கை, கரூர், சேலம் உள்ளிட்ட பல்வேறு மாவட்டங்களிலும் இதேபோன்ற முதலீட்டு நிறுவனங்களை நடத்தி பொதுமக்களிடம் இருந்து பெருமளவில் பணம் வசூலித்து மோசடி செய்திருப்பது வெளிச்சத்துக்கு வந்தது.

இதனைத் தொடர்ந்து பொருளாதார குற்றப்பிரிவு காவலர்கள் கண்ணன் மற்றும் கமலதாஸ் ஆகிய இருவரையும் கைது செய்து தீவிர விசாரணை மேற்கொண்டு வருகின்றனர்.

இந்த மோசடி வலையமைப்பில் மேலும் யாருக்கெல்லாம் தொடர்பு உள்ளது என்பது குறித்தும் தொடர்ந்து விசாரணை நடைபெற்று வருவதாக தெரிவிக்கப்படுகிறது.