அனைத்திந்திய புரட்சித்தலைவர் மக்கள் முன்னேற்ற கழகத்தின் பொதுச்செயலாளர் சசிகலா வெளியிட்டுள்ள எக்ஸ் தள பதிவில், கடலூர் மாவட்டம் பரங்கிப்பேட்டை கடற்பரப்பில் நான்கு ஹைட்ரோ கார்பன் கிணறுகள் அமைப்பதற்காக ஹிந்துஸ்தான் எண்ணெய் நிறுவனம் தமிழக அரசிடம் அனுமதி கோரியிருப்பது மிகுந்த அதிர்ச்சியையும் கவலையையும் ஏற்படுத்துவதாக தெரிவித்துள்ளார்.

சுற்றுச்சூழல் சமநிலையை சீர்குலைக்கும் அபாயம் கொண்ட இந்த திட்டத்திற்கு மத்திய மற்றும் மாநில அரசுகள் எவ்வித அனுமதியும் வழங்காமல், தொடக்க நிலையிலேயே தடுத்து நிறுத்த வேண்டும் என்றும் அவர் வலியுறுத்தியுள்ளார்.

கடலூர் மாவட்டம் பரங்கிப்பேட்டை மற்றும் அதன் சுற்றுவட்டாரப் பகுதிகளில் ஏற்கனவே எண்ணெய் மற்றும் எரிவாயு தொடர்பான ஆய்வுப் பணிகள் பல்வேறு கட்டங்களில் நடைபெற்று வருவதாக தகவல்கள் வெளியாகி வருகின்றன. இந்த சூழலில், கடற்கரையிலிருந்து சுமார் 18 கிலோமீட்டர் தொலைவில் ரூ.425 கோடி மதிப்பீட்டில் நான்கு ஹைட்ரோ கார்பன் கிணறுகளை அமைக்க கடலோர ஒழுங்குமுறை ஆணையத்தின் அனுமதியை ஹிந்துஸ்தான் எண்ணெய் நிறுவனம் நாடியிருப்பது புதிய அச்சத்தை ஏற்படுத்தியுள்ளதாக அவர் குறிப்பிட்டுள்ளார்.

இந்த திட்டம் நடைமுறைக்கு வந்தால், கடல் வளங்கள் மட்டுமின்றி ஆயிரக்கணக்கான மீனவ குடும்பங்களின் வாழ்வாதாரமும் நேரடியாக பாதிக்கப்படும் அபாயம் இருப்பதாகவும் அவர் சுட்டிக்காட்டியுள்ளார்.கடலூர் மாவட்டத்தில் ஏற்கனவே நெய்வேலி பழுப்பு நிலக்கரி நிறுவனம், சிப்காட் தொழிற்பேட்டைகள் மற்றும் பல்வேறு தொழில் நடவடிக்கைகள் காரணமாக சுற்றுச்சூழல் கடுமையான அழுத்தங்களை சந்தித்து வருவதாக கூறப்படும் நிலையில், மேலும் ஒரு பெரிய எரிசக்தி திட்டம் அறிமுகப்படுத்தப்படுவது இயற்கை வளங்களின் மீதான சுமையை அதிகரிக்கும் என்றும் தெரிவித்துள்ளார்.

உலகளவில் காலநிலை மாற்றம், கடல் மட்ட உயர்வு மற்றும் புவி வெப்பமயமாதல் போன்ற சவால்கள் தீவிரமடைந்து வரும் நிலையில், கடலடிப் பகுதியில் மேற்கொள்ளப்படும் துளையிடும் பணிகள் கடல் உயிரினங்களின் இயற்கை வாழ்விடங்களை பாதிக்கும் அபாயம் இருப்பதாக சுற்றுச்சூழல் ஆர்வலர்கள் தொடர்ந்து எச்சரித்து வருவதாகவும் அவர் குறிப்பிட்டுள்ளார்.

குறிப்பாக, கடற்புற்கள், பவளப்பாறைகள் மற்றும் மீன் இனங்களின் இனப்பெருக்க மண்டலங்கள் பாதிக்கப்படுமானால், அதன் தாக்கம் பல ஆண்டுகளுக்கு நீடிக்கும் சூழல் உருவாகலாம் என்றும் அவர் தெரிவித்துள்ளார்.

இயற்கை வளங்களின் பாதுகாப்பு, கடல்சார் உயிரியல் அமைப்பின் நிலைத்தன்மை மற்றும் மீனவ சமூகத்தின் வாழ்வுரிமை ஆகியவற்றை கருத்தில் கொண்டு, சுற்றுச்சூழலுக்கு பேராபத்தை ஏற்படுத்தக்கூடிய இத்தகைய திட்டங்களுக்கு அனுமதி வழங்காமல் மத்திய மற்றும் மாநில அரசுகள் உறுதியான நிலைப்பாட்டை எடுக்க வேண்டும் என்றும் சசிகலா கேட்டுக் கொண்டுள்ளார்.

இவ்வாறு அந்த பதிவில் தெரிவிக்கப்பட்டுள்ளது.