கரூர் நாடாளுமன்ற உறுப்பினர் செ.ஜோதிமணி, தனது தொகுதியில் பிஞ்சுக் குழந்தைகள் உட்பட 41 பேரின் உயிரைப் பறித்த கொடூரமான துயரச் சம்பவம் நடந்து ஓராண்டு நிறைவடைந்துள்ள நிலையில், அதுகுறித்துப் தனது வாட்ஸ்அப் பக்கத்தில் மிக உருக்கமான பதிவு ஒன்றை வெளியிட்டுள்ளார். தனது தாயார் மறைந்த போது அடைந்த மனவேதனைக்குப் பிறகு, தன்னை முற்றிலும் நொறுக்கிப்போட்ட நிகழ்வு இதுவே எனக் குறிப்பிட்டுள்ள அவர், இத்தனை நாட்கள் கடந்தும் அந்த ஆறாத வடு மனதின் ஆழ் அடுக்கில் ஆறாத் துயரமாக நிலைத்திருப்பதாகத் தெரிவித்துள்ளார்.

மருத்துவமனை அனுபவமும் ஆறாத் துயரமும்:

துயரம் நிகழ்ந்த காலத்தில் கரூர் அரசு மருத்துவமனைச் சவக்கிடங்கிலும், தீவிர சிகிச்சைப் பிரிவிலும் தான் கண்ட காட்சிகள் நெஞ்சை நடுங்க வைப்பதாக அவர் விவரித்துள்ளார். பிஞ்சுக் குழந்தைகளையும், உறவினர்களையும் இழந்து கதறிய மக்களுக்கோ, அஞ்சிய உடலோடு மருத்துவமனைப் படுக்கையில் உறைந்து கிடந்தவர்களுக்கோ ஆறுதல் சொல்ல வார்த்தைகளின்றித் தான் உடைந்துபோனதாகக் குறிப்பிட்டுள்ளார். பாதிக்கப்பட்ட வீடுகளுக்குச் சென்று ஆறுதல் கூறிய அந்த கொடூர நாட்களில் ஏற்பட்ட கடுமையான மன உழைச்சல் மற்றும் பயங்கர நினைவுகள் காரணமாக, தான் தொடர்ந்து 20 நாட்கள் மருத்துவமனையில் தங்கிச் சிகிச்சை பெற்ற பின்னரே இயல்பு நிலைக்குத் திரும்ப முடிந்ததாக அவர் நினைவு கூர்ந்துள்ளார்.

விசாரணை முடக்கம் மற்றும் நீதிக்கான கோரிக்கை:

இந்தத் துயரச் சம்பவம் நடந்து ஓராண்டு முடிந்த பின்னரும், உயிரிழந்த மக்களின் குடும்பங்களுக்கு இன்னும் உரிய நீதி கிடைக்கவில்லை என்றும், இது தொடர்பான விசாரணை கிடப்பில் போடப்பட்டுள்ளதாகவும் ஜோதிமணி அங்கம் தெரிவித்துள்ளார். இந்த உண்மையைத் தன்னால் எளிதில் கடந்துபோக முடிவதில்லை என்றும் அவர் மிகுந்த கவலை தெரிவித்துள்ளார்.

மக்களின் பிரதிநிதியாகத் தான் இரண்டு முக்கியமான கோரிக்கைகளை முன்வைப்பதாகக் குறிப்பிட்டுள்ள அவர்: உயிரிழந்த 41 பேரின் குடும்பங்களுக்கும் உரிய நீதி விரைந்து கிடைக்க வேண்டும். இதுபோன்ற கொடூரமான அசம்பாவிதம் இனி நாட்டின் வேறு எந்தப் பகுதியிலும், யாருக்கும் மீண்டும் நிகழக் கூடாது. இழப்பை எவராலும் ஈடுசெய்ய முடியாது என்றபோதிலும், காலம் பாதிக்கப்பட்ட மக்களுக்கு மீண்டும் மீண்டு வரும் வல்லமையை வழங்கி, அவர்களது வாழ்வில் மீண்டும் மகிழ்ச்சியைத் துளிர்க்கச் செய்ய வேண்டும் எனத் தனது பேரன்பையும் ஆறுதலையும் தெரிவித்துள்ளார்.