புதுக்கோட்டை மாவட்டம் ஆலங்குடி இந்திரா நகர் பகுதியைச் சேர்ந்த தங்கராசுவின் மகன் ஹரிஹரசுதன் (31). தொழில்முறையாக லாரி ஓட்டுநராக பணியாற்றி வந்த அவர், சர்மிளா என்பவரை கடந்த ஆண்டு திருமணம் செய்து கொண்டார். பணியின் தன்மை காரணமாக மூன்று நாட்களுக்கு ஒருமுறை மட்டுமே வீட்டிற்கு வந்து செல்வதாக குடும்பத்தினர் தெரிவித்துள்ளனர்.

இந்நிலையில், வருகிற 26-ந்தேதி மனைவி சர்மிளாவின் பிறந்தநாள் வரவிருப்பதால், அதற்கான அன்புப் பரிசாக புதிய செல்போன் ஒன்றை வாங்கி, நேற்று முன்தினம் இரவு வீட்டிற்கு வந்த ஹரிஹரசுதன் தனது மனைவியிடம் வழங்கியுள்ளார்.

ஆனால் எதிர்பாராத விதமாக, அந்த பரிசைப் பெற சர்மிளா மறுத்ததாக தெரிவிக்கப்படுகின்றது. இதனால் மனவேதனை அடைந்த ஹரிஹரசுதனை அவரது தாயாரும், சகோதரரும் ஆறுதல் கூறி சமாதானப்படுத்தியதாகத் தெரிவிக்கப்படுகிறது.

இந்த சூழ்நிலையில், நேற்று அதிகாலை வீட்டிலுள்ள கழிவறையில் ஹரிஹரசுதன் தூக்கில் தொங்கிய நிலையில் காணப்பட்டார். இதைக் கண்டு அதிர்ச்சி அடைந்த குடும்பத்தினரும், அக்கம்பக்கத்தினரும் உடனடியாக அவரை மீட்டு ஆலங்குடி அரசு மருத்துவமனைக்கு கொண்டு சென்றனர்.

அங்கு மருத்துவர்கள் மேற்கொண்ட பரிசோதனையில், ஹரிஹரசுதன் ஏற்கனவே உயிரிழந்துவிட்டதாக தெரிவித்தனர்இந்த துயரச் சம்பவம் தொடர்பாக பெறப்பட்ட புகாரின் அடிப்படையில், ஆலங்குடி காவலர்கள் வழக்குப் பதிவு செய்து பல்வேறு கோணங்களில் விசாரணையை முன்னெடுத்து வருகின்றனர்.