கர்நாடக மாநிலத்தில் கனமழை காரணமாக அங்குள்ள கபினி மற்றும் கிருஷ்ணராஜ சாகர் ஆகிய இருஅணைகள் முழு கொள்ளளவை எட்டி நிரம்பிவிட்டது. இதில் அணைகளின் பாதுகாப்பிற்காக உபரிநீர் திறந்து விடப்பட்டது.இதன் காரணமாக கடந்த 2 தினங்களாக தர்மபுரி சுற்றுலாத் தலமான ஒகேனக்கல்லுக்கு வினாடிக்கு 1,25,000 கனஅடி தண்ணீர் வந்தது.

பிறகு இந்த நீர்வரத்து படிப்படியாக குறைய தொடங்கி, நேற்று காலை 8 மணி நிலவரப்படி வினாடிக்கு 88000 கனஅடியாக குறைந்தது.இது தற்போது கர்நாடகா அணைகளிலிருந்து உபரி நீர் திறப்பு குறைக்கப்பட்டதால் நேற்று மாலை ஒகேனக்கல்லுக்கு வினாடிக்கு 43000 கனஅடியாக குறைந்தது.இதைத்தொடர்ந்து இன்று காலை 8 மணி நிலவரப்படி நீர்வரத்து வினாடிக்கு 43000 கனஅடியாக நீடித்து வருகிறது.

இதனால் காவிரி ஆற்றில் வெள்ளப்பெருக்கு ஏற்பட்டுள்ளதால் ஒகேனக்கல் ஐந்தருவிகள்,மெயின் அருவி, சினிபால்ஸ் உள்பட அருவிகளை மூழ்கடித்தவாறு தண்ணீர் ஆர்ப்பரித்து செல்கிறது. மேலும் கர்நாடகா அணைகளுக்கு வரும் நீர் வரத்து குறைந்ததால் வெளியேற்றப்படும் உபரி நீரின் அளவும் குறைய வாய்ப்புள்ளதாக அதிகாரிகள் தெரிவிக்கின்றனர்.

மத்திய நீர்வளத்துறை அதிகாரிகள், ஒகேனக்கல் காவிரி ஆற்றில் நீர்வரத்தை கர்நாடக-தமிழக எல்லையான பிலிகுண்டுலுவில் தீவிரமாக கண்காணித்து வருகின்றனர்.கர்நாடகா அணைகளிலிருந்து வெளியேற்றப்பட்டு வரும் உபரி நீர் காரணமாக ஒகேனக்கல் காவிரி ஆற்றில் நீர்வரத்து குறைவதும், அதிகரிப்பதுமாக உள்ளது.

காவிரி ஆற்றில் தொடர்ந்து வெள்ளப்பெருக்கு ஏற்பட்டு வந்தன.இதனால் சுற்றுலா பயணிகளின் நலன் கருதி சுற்றுலா பயணிகள் அருவி மற்றும் ஆற்றுப்பகுதிகளில் குளிப்பதற்கும் பரிசல் பயணம் மேற்கொள்வதற்கும் மாவட்ட நிர்வாகமானது விதிக்கப்பட்ட தடை தொடர்ந்து 5-வது நாளாக நீடித்து வருகிறது.

இதனால் கர்நாடகா, கேரளா, ஆந்திரா உள்ளிட்ட மாநிலங்களில் இருந்து வரக்கூடிய சுற்றுலா பயணிகளும், அதேபோல தமிழகத்தின் உள் மாவட்டங்களிலிருந்து வரும் சுற்றுலா பயணிகளும் அருவி மற்றும் ஆற்றுப்பகுதிகளில் குளிக்க முடியாமலும், பரிசல் மூலம் சென்று காவிரி ஆற்றின் இயற்கை அழகை ரசிக்க முடியாமலும் ஏமாற்றத்துடன் திரும்பிச் செல்லும் சூழ்நிலைக்கு தள்ளப்பட்டுள்ளன.